Nongstoiñ, Naitung 07:
Ka kynhun ïalehkai jong ka Sibsingh Govt. Memorial Higher Secondary School bad ka St. Peter’s HSS ki la khur ïa ka nam lahduh ha ka District Level Subroto Mukherjee Cup Football tournament 2023 ba la pynlong da ka shlem trei kam jong ka District Sports Officer, West Khasi Hills.
Ka jingïoh khur nam lahduh jong ka Sibsingh ka la wan ha ka Under-17 jong ki kynthei bad shynrang.
Ha ka jingïakhun final jong ka U-17 ki khynnah shynrang, ka Sibsingh ka la lah ban pynliem noh ïa ka JJM Nichol’s Roy Secondary School da 1-0 kol ha ka Sngi Thohdieng ha madan Mawkadiang, West Khasi Hills.
Kumjuh ha ka final jong ka kyrdan ïalehkai U-17 ki khynnah kynthei, ka Sibsingh ka la jop da 1-0 kol ïa ka BBC Secondary School Steplanglur.
Haba phai sha ka jingïakhun final jong ka Under-14 ki khynnah shynrang, ka St. Peter’s ka la pynliem noh ïa ka St. Anthony’s Secondary School Jaidoh da 1-0 kol.
Ïa ka nam rangïalehkai ba kynsai ha ka Under-14 la ïoh da u Bankiew Lyngdoh na ka Public Secondary School, ha ka Under-17 ki khynnah kynthei la khur da ka Henlendmery Thabah na ka BBC Secondary School, katba ha liang ka Under-17 ki khynnah shynrang la khur da u Pynbianglang Kharsyntiew na ka Sibsingh Govt. Memorial.
Ïa ki khusnam sha kine ki kynhun la sam da u MLA ka Rambrai u R.G Momin kum u kongsan ha ka jingïadonlang ka Kong Balarina Syiem kum ka District Sports Officer bad kiwei kiwei.
Kumta ka Sibsingh lem bad ka St. Peter’s HSS kin mihkhmat ïa katei ka district sha ka State Level Subroto Mukherjee Cup ka ban long shen ha ka nongbah Shillong.
