Shillong, Naitung 07:
Ka lahduh jong u snem ba la dep, ka Mawlai SC bad ka Lumparing SC ki la long kiwei pat ki kynhun kiba la lah ban pyntikna ïalade ban jam sha ka semi final ha ka Women’s League Shillong Sports Association hadien ba khur biang ïa ka jingjop kaba saw ha ka Sngi Thohdieng.
Ka Lumparing ka la pynjem khnap ïa ka Synroplang 77 da 6-0 kol, katba ka Mawlai ka la jop da 7-0 kol ïa ka Maw U-Tieng. Baroh ar kine ki jingïakhun na ka Group-B. Ha ka Sngi Palei, ka Laitkor SC bad ka PFR Football Academy ki la ïoh rung sha ka semi final na ka Group-A.
Namar ki jingïakhun jong ka league ki dangsah, ki bor pynïaid kim pat shym la rai ïa ki jingïakhun semi final.
Ha ka jingïakhun kaba nyngkong, ka Lumparing bad ka Synroplang ki la lah ban ïalehkai bha naduh kaba sdang, hynrei hadien shiteng kynta ka Lumparing ka la ïoh ban pynkhih jar lyngba ka Chibaral Sangma (32′).
Hadien katto kane por katei ka kynhun ka la pynbud biang ïa ka kol kaba ar lyngba ka Catherine Kharkongor ha ka minit kaba 38 bad kaba la pynbud biang ha ka minit ba 69.
Ïa kiwei pat ki kol kiba dangsah la pynbud da ka Ephilis Khongwet (47′) bad ka Inri-la-i-dor Khongthaw (49′ & 67′) na ka bynta ban pynlong syndon ïa ka Lumparing ban khur ïa ka jingjop.
Haba phai sha kawei pat ka jingïakhun, ka Mawlai ka la lah ban ïalehkai bha naduh kaba sdang ha kaba ka Makrisha Songthiang (3′) ka la pynkhih jar nyngkong. Ka Sunalinda Iawren (8′, 24′, 29′, 53′) ka la ïoh ban thep marwei haduh saw kol. Ïa kiwei pat ki ar kol la pynbud da ka Dai-aijingsuk Basaiawmoit (25′) bad ka Ideibanri Kharpan (46′).
Lyngba kane ka jingjop, ka Mawlai ka la ïoh ban lamkhmat na ka Group-B da kaba kamai 12 point na ki saw sien ïakhun bad ka la thep haduh 33 kol bad shah thep shi kol, katba ka Lumparing kaba la jop mar saw sien ka la thep 23 kol bad kam shym la shah thep wat tang shisien ruh.
Kane ka lympung kan bteng biang ha ka 12 tarik ha kaba ka Kick Start Football Coaching Centre kan ïakhun pyrshah ïa ka Umpling SC ha ka por 2:30 noh phai sngi bad ka Mawkriah West SC ïa ka Lawei Smit SC ha ka por 4:15 janmiet.
