Washington, Naitung:
Ha kane ka khubor la ong ba utei u briew ia uba la ithuh kum u John Dimmig bad uba la don 33 snem ka rta, u la shah bat noh ha ki pulit hadien ba u leit shoh bad ai jingsneng ia u paralok jong ka kurim jong u namar ka jingiadei ba sop- sop hapdeng jong ki.
Ia katei ka kurim la tip kyrteng ka Christie Barbato.
U John u la kem ka jing bitar hadien ba u lap ia katei ka kurim jong u katba ka dang iathiah lang bad utei u paralok jongka ha katei ka jingjia.
Katkum ka ejahar ba la ujor pyrshah ia u, la ong ba u John tang mar ia rung hapoh jong katei ka kamra, u la khang ia ka kamra bad u la shoh ia utei u briew uba thiah bad ka kurim jong u bad hadien kata u la pynthiah ha madan bad tied da u kynja nar haduh 3 sien.
Ki pulit ki la ioh ia ki video na ki CCTV camera ba la pyndait ha katei ka iing bad la iohi ia u John ha ka por ba u wan ha ryngkat bad katei ka kynja bat nar bad la iohi ba u John u la shoh bad tied ia utei uwei pat haduh ba un da thiah hajuh bad hadien kata u la maham ia utei u briew ba um dei shuh ban wan tur ia ka kurim jong u bad nangta u la mih bad phet noh na katei ka iing.
Utei u briew u la iathuh ba u la dei ban iap lada ka Barbato kam shym la leit ban beh ia u kurim jongka ha katei ka sngi bad u John u la thmu ban pyniap noh syndon ia utei u briew ha katei ka jingjia.
Hapdeng ka jingtohkit, u John u la phla ha ki pulit ba dei ma u uba la sdang ban ktah kti ia utei u briew bad u la bud dien ia ki arngut naduh ka por ba ki leit sha kawei ka dukan haduh ba kin da leit poi ha katei ka iing ha Lake Park bad u la pynlut por baroh shi sngi ban ap ia ki ha katei ka iing.
Ki pulit ki la pynngat noh ia u John hapoh ki kyndon pynkheiñ aiñ jong ka ri namar ki jingleh pynkheiñ aiñ jong u. La iathuh ruh ba la pynngat ia u John ha katto katne ki kyndon pynkheiñ aiñ jong ka jingpyniap briew namar katei ka kam thombor jong u ha katei ka jingjia.
