New Delhi, Naitung:
Katkum ki khubor la ong ba ka Iran ha ka taiew ba la lah, ka la ioh ban rung ha ka thup Shanghai Co-operation Organisation (SCO) hapoh ka jingialang ba la lam khmat da ka India ha katei ka sngi. La ong ba ka Iran mynta ka la long ka dkhot ba pura jong kane ka kynhun.
Ha kaba ai jingkren ha katei ka sngi, u Myntri Rangbahduh ka ri India- u Narendra Modi, u la ai khublei ia u President ka Iran- u Ebrahim Raisi bad kumjuh ruh ia baroh ki paidbah nongshong shnong ka Iran halor ka jingioh jong ka ri jongki ban long noh ka dkhot ba pura jong katei ka kynhun Shanghai Co-operation Organisation (SCO).
Kumjuh ruh la ong ba ki don bun tylli ki ri kiba kwah ban leit pyniasoh sha ka kynhun SCO ha kine ki sngi, kum shi bynta ban pynkhlaiñ ia katei ka kynhun bad kumjuh ruh ban long ka jingiarap ia ki hi, ha ki por ba donkam.
Ia katei ka jingialang, la lam khmat da u Myntri Rangbahduh ka India, ha kaba la ïashim bynta bad iadon lang ruh da u President ka China- u Xi Jinping, u President ka Russia- u Vladimir Putin, u Myntri Rangbahduh ka Pakistan- u Shehbaz Sharif bad kumjuh ruh kiwei- kiwei de ki heh kiba la shah khot bad kiba long ki dkhot jong katei ka kynhun.
Ha ka jingai jingkren jong u ha katei ka sngi, u Raisi pat u la ong ba la ngeit skhem ba ka jingioh rung jong ka Iran hapoh jong katei ka kynhun kan iarap ban kyntiew ia ka jinglong- jingman jong baroh ki ri kiba don hapoh jong katei ka kynhun bad ban ioh ruh ban ia ai ka kti ka mon- kti ka diang bad kumjuh ruh ban iatylli lang kawei kum ki dkhot jong kawei ka kynhun.
Kumta, ha katei ka sngi, ki heh ka Iran ki la ioh ban soi ia katto katne ki jingdonkam kum ki jingiakut bad jingiamynjur ban iatrei lang kum ki dkhot jong katei ka kynhun SCO.
La ong ruh ba ka long kaba donkam ban ioh ia ka jingsoi haba iadei bad ka Memorandum of Obligations da ka Republic of Belarus khnang ban ioh ia ka jingmynjur ban long ki dkhot ba pura jong ka SCO.
Ia ka SCO la wanrah ha ka jingialang ki ri bapher hapoh Shanghai ha u snem 2001 bad ia katei ka kynhun la wanrah da ki nongialam ka Russia, China, Kyrgyz Republic, Kazakhstan, Tajikistan bad Uzbekistan. Katba, ka India bad Pakistan pat ki la ioh ban long ki dkhot ba pura jong katei ka kynhun naduh u snem 2017 ba la pdiang bad pynrung dkhot pura ia ki.
