C. B. Iawphniaw
Kum ki paidbah nongjied ngi dei ban da pyrkhat bha ban jied ia u nongmihkhmat. U nongmihkhmat uba tip briew tip Blei bad uba la don ka jingnang jingtip bad uba lah ban wanrah ki kam pynroi hapoh ka Constituency. Bad ym dei ban jied tang ïa uba la pass bun ki Degree ha ka jingpule hynrei um nang ban thaw ki lad ki lynti ban ïarap ïa ki briew ba duk bad ba shem kyrduh.
Ngi donkam ïa u nongmihkhmat uba pynioh skhim ïa ki shnong ki thaw. Ngi donkam ia u briew uba wanrah ki skhim bapher bapher na ka sorkar kmie bad na ka sorkar jylla ban pynioh jingmyntoi ïa ki nongshong shnong bad ïa ka Jylla hi baroh kawei. Ngim donkam ïa u nongmihkhmat uba leh meng bad uba pnah thylliej uba nang ban wohdong ne ai ñia hapoh Assembly. Hynrei um lah pat ban wanrah bad ai ki jingïarap kum ka jingshna ia ki lynti ki syng-kien (footpath) ki um bam umdih bad ki nala ban shna pynbha bad bun kiwei kiwei ki jingdonkam hapoh ki shnong ki thaw. U nongmihkhmat uba peit ïa ka bha ka miat ka khuid ka suba, u long u nongmihkhmat uba ka constituency ka donkam ban jied ia uba kum uta.
U nongmihkhmat u bym peit shiliang ïa kiei kiei baroh bad u bym don ka mynsiem sngewpher jait pher kynja bad sngew pher niam pher rukom. U nongmihkhmat uba don ka main rangbah ym uba don ka reng mattah bad uba kham lait na ka bishni ka pihuin para briew. Uba don ka mynsiem sngewrit ym uba sarong kam pher na kano kano ka parti seng saiñ hima sima hynrei uba shim khia ban trei na ka bynta ka ri bad ka jaitbynriew.
