Imphal, Naitung:
U Myntri ba dei khmih ïa ka tnat pule puthi ha Manipur u Thounaojam Basantakumar Singh u la pyllait paidbah ïa ka “Chief Minister’s College Students’ Rehabilitation Scheme (CMCSRS) – 2023” ha ka sngi Thohdieng.
Ka skhim hapoh ka phang ‘Education Knows No Barrier’, la pyllait paidbah na ka bynta ki khynnah pule ki bym don jaka sah shuh kiba don ha ki kyrdan ba hapoh ka Graduate ba kin lah ban bteng ïa ki jingpule jong ki khlem kino kino ki jingshah pynthut. Kane ka prokram ba la pynïaid da ka Department of University and Higher Education, la pynlong ha ka Auditorium of Directorate of Information and Public Relations, Nityaipat Chuthek ha Imphal.
U Myntri ka tnat pule puthi u Basantakumar Singh u la ong ba hapoh ka jingai jingkyrshan u Myntri rangbah u N Biren Singh, la lah ban pyllait thymmai ïa ka skhim CMCSRS halor ka jingthmu ban pynbiang ïa ki jingdonkam ha kaba ïadei bad ka pule puthi sha ki khynnah pule kiba ha ki kyrdan ba hapoh ka Graduate kiba ym don jaka sah shuh kiba pule ha ki kolej jong ka sorkar ne kiba la shah ithuh ha ka sorkar kiba don ha Manipur khnang ba kin ïohlad ban bteng ïa ki jingpule jong ki namar ki jinglong jingman ha ka jylla.
