Aizawl, Naitung:
Naba ka Mizoram ka dang ap ïa ki jingïarap ki ban wan na ka sorkar kmie, ka sorkar jong katei ka jylla ka la sdang na ka bynta ban pynmih pisa kum shi bynta ban ai jingïarap sha palat 12,200 ngut ki briew kiba la wan na ka jylla Manipur kaba la shah ktah jur na ki jingjia ïakynad bad ka jingïaumsnam, la ong u heh sorkar na ka tnat ki kampohïing.
U heh sorkar u la ong ba ka sorkar jylla ka la phah shithi na ka bynta ban ïoh ka jingnohsynñiang na ki Myntri, ki MLA, ki nongtrei jong ka sorkar kmie bad ki sorkar jylla, ki Corporator jong ka Aizawl Municipal Council bad ki nongtrei Bank naduh ka taïew ba la lah.
Ki shipai ïada ri kum ka tnat shipaiAssam Rifles, Indian Army bad Border Security Force (BSF) kin sa shah kyrpad ha kaba ïadei bad ka jingnoh synñiang na ka bynta ki briew kiba don ha ki jaka sah ba shipor, u la ong.
U la ong ruh ba ka sorkar kmie haduh mynta kam pat phah jingïarap eiei la shibnai hadien ba ka jylla ka la pan jingïarap na ka bynta ki briew kiba la wan na katei ka jylla Manipur hadien ba la mih ka jingïakynad kaba jur ha ka 3 tarik, Jymmang.
