Shillong, Naitung 09:
Ka Paris St-Germain (PSG) ka la pyndep ban soi ïa u rangïalehkai ka South Korea u Lee Kang na ka club Real Mallorca kaba ha La Liga, Spain.
Une u rangïalehkai ba dang 22 snem ka rta, uba la pynlut haduh ar snem bad kane ka club na Spain, u la soi ïa ka kontrak kaba san snem bad kane ka club thymmai na France.
U Lee un dei u rangïalehkai ba saw ba ka PSG kan soi ha kane ka ïew ïadie ïathied rangïalehkai, kata hadien ba ka la dep ban soi ïa u rangïalehkai pdeng u Manuel Ugarte, u rangïalehkai dien u Milan Skriniar bad u rangïalehkai shakhmat u Marco Asensio.
“Ka long shisha kaba sngew tynnad bad kem bha ban lah ban pynïasoh sha ka club Paris St-Germain,” u la ong bad bynrap ba ka dei kawei na ki club kaba khraw tam ha pyrthei, ha kaba ka don ruh ïa ki rangïalehkai kiba paw jong ka pyrthei bad ïa kaba ngam lah shuh ban ap ban sdang ïa ka lynti ba thymmai.
U Lee u la ïoh ban mih madan haduh 19 sien na ka bynta ka ri jong u, ka South Korea bad u dei ruh uba la ïalehkai ha ka lympung World Cup ha u snem 2022.
U coach barim ka Spain bad jong ka Barcelona u Luis Enrique u la shimti thymmai kum u Coach jong ka PSG dang ha kane ka taïew, hadien ba ka club ka la sloit noh ïa u Christophe Galtier na ka kam.
