Agartala, Naitung:
Ki shipai Assam Rifles ha ka sngi Saitjaiñ ki la ïoh ban kurup ïa u Marijuana uba don 498 kilo bad uba la kot sha ka dor kaba T. 2 klur na uwei u briew ha Dhalai distrik jong ka Tripura.
Ki shipai Assam Rifles ki la ong ba ïa une uba la shah kynnoh la kem na ka thaiñ Ambassa jong ka Dhalai hadien ba la ïoh ban kurup ïa u Marijuana. “Ki shipai jong kane ka tnat ha Radhanagar Battalion jong ka Agartala ha ryngkat ka jingïatreilang jong u Inspector General Assam Rifles (East) ha kane ka sngi ki la ïohkem ïa uwei u briew na Ambassa, kaba don ha Dhalai distrik jong ka Tripura bad ïoh ban kurup ruh ïa u Marijuana uba 498 kilo uba la kot sha ka T. 2 na une uba la shah kynnoh,” la ong ka jingthoh ba la pyntip halor ka jingjia.
Hashwa kane, ha ka 30 tarik, Jylliew, ki pulit jong ka Tripura ki la kem ïa arngut ki briew ha ryngkat u Heroin ba palat 3 kilo uba la kot sha ka T. 13.8 klur ha ka ïew bar ri na ka thaiñ Ambassa kaba don ha Dhalai distrik. U Myntri Rangbah jong ka Tripura u Manik Saha u la ai ka jingïaroh ïa ki pulit halor kane ka jingïoh kurup, ha kaba la ong ba kane ka long ka dak ban pyni ba ka jingpyntreikam jong ki kan sa lah ban pynduhnoh ïa ki kam sniew kiba la mih na u drok ha ka jylla.
