Jowai, Naitung 10:
Ka Lumkhangdong Kyndongtuber, Nangbah Khloopano, Madanthad Thadmuthlong bad ka Mulang Ïalong ki la khur ïa ka jingjop ha ka 3rd Division Football Tournament (3rd Adelbert Laloo Memorial Trophy) ba la pynïaid da ka West Jaiñtia District Sports Association (WJDSA) ha ka Lah Sngi U Blei ha Kiang Nangbah Stadium kaba ha Ladthadlaboh, Jowai.
Ha ka jingïakhun kaba nyngkong, ka Lumkhangdong Kyndongtuber ka la pynliem ïa ka Luti Tuber Ïalong da 2-1 kol. U Damepaia Shylla u la ïoh ban thep ar kol ha ka minit kaba 24 & 56, katba ka Luti Tuber Ïalong ka la pynphai kylla shi kol lyngba u Leader Mulieh (42).
Ha ka jingïakhun ba ar, ka Nangbah Khloopano ka la pynliem ïa ka Lumpyrtuh Mihmyntdu da 2-1 kol. U Teibor Lamare u la ïoh ban thep ar kol ha ka minit kaba 23 & 43. Katba ïa ka shi kol jong ka Lumpyrtuh Mihmyntdu la thep da u Telme Rymbai (33).
Ha ka jingïakhun kaba bud, ka Madanthad Thadmuthlong ka la pynliem ïa ka Samaro da 4-0 kol. U Precious Tang u la khur ïa ka hat-trick (9,11 & 13) bad ïa kawei pat la thep da u Manhok Suchiang (40).
Haba phai sha ka jingïakhun kaba khatduh, ka Mulang Ïalong ka la pynliem ïa ka Royal Pole Mihmyntdu da 2-0. Ïa kine kol la thep da u Poisuk Dhar (58) bad u Dangaitlang Mulieh (67).
