Braslia, Naitung:
Ki heh ka sorkar Brazil ha ka Lah Sngi U Blei ki iathuh ba 14 ngut ki briew ki la duh ei la ka jingim na ka jingkhyllem ka ïing mala ba sah briew ha ka thaiñ Shatei Lam Mihngi jong katei ka ri ha ka Sngi Thohdieng.
Katei ka jingkhyllem ka la jia ha ka Sngi Thohdieng ha ka thaiñ Janga kaba don ha markhap bad ka Recife, kaba long ka nongbah jong ka Pernambuco.
Ka jingkhyllem jong katei ka ïingmala ka long hadien u slap uba jur uba la ther ia katei ka thaiñ khlem sangeh bad ka la jia ruh ha ka por shiteng miet ba baroh ki nongshong wai ha katei ka ïingmala ki dang iohthiah lyngngai.
Katkum ka kaiphod na ka tnat iarap, la ong ba 3 ngut ki briew ki lait na katei ka jingkhyllem hynrei ym pat shym la ioh jingtip pat shaei ki don bad kumno ki long hadien ka jingkhyllem jong katei ka iing mala.
Ha ka Sngi Thohdieng, ki heh jong katei ka nongbah ki la pyntip lypa ba 8 ngut ki briew ki la khlad hashen hapdeng ka jingkhyllem jong katei ka iing.
Ka Lat jong ka Pernambuco, ka Raquel Lyra, ha ka Sngi U Blei ka la phah ia ka kyrwoh sngewlem sha ki bahaiing- hasem jong kitei kiba khlad baroh bad kumjuh ruh ia kito kiba la ngat bad mynsaw ha katei ka jingjia ba sngewsih ha katei ka miet.
Ka Recife, ka long ka nongbah rud duriaw, kaba do ia kumba 1.5 Million ngut ki paidbah nongshong shnong bad kane ka thaiñ ka la ioh mad ia u slap uba jur bad ba khlem sangeh ha kine ki sngi jong ka taiew ba la lah.
