Mexico City, Naitung:
Ki bor pyniaid jong ka Mexico ki la pyntip ba la lap ia ka met jong u nongthoh khubor ka La Jornada, uba la jah ha ka thaiñ sepngi jong ka Nayarit naduh ki katto katne sngi ba la leit.
Ia utei u nongthoh khubor la ithuh kum u Luis Martin Sanchez Iniguez, uba la don 59 snem ka rta bad ia ka met jong u la shem na ka shnong Huachines hapoh ka thaiñ municipal jong ka Tepic .
Ka kurim jong u, ka Cecilia Lopez, haba iakren bad ki lad pathai khubor ka la iathuh ba ka la khuslai jingmut bha shaphang ka jingjah iing jong u naduh ka Sngi Balang jong ka taiew ba la leit, naduh ka sngi ba ka leit sha kawei pat ka shnong ba marjan ban leit jngoh ia ki bahaiing hasem jongka.
Ia ka met jong u Sanchez la lap ha ka Sngi Saitjaiñ na ki bynta ba kyndong jong ka Tepic, kaba long ka nongbah jong ka Nayarit. Don ruh ki katto katne ki lad pathai khubor na katei ka thaiñ kiba iathuh ba la shem ia u hapoh ka song plastik bad u don ruh ia ka jingthoh ba la pyndait bad tah ha ka shadem jong u.
ka Lopez ka la iathuh ba u Sanchez u don ha iing ha ka por ba u phone ia ka, ha katei ka miet Sngi Balang katba ka dang leit sah kai sha iing jong ki bahaiing.
Hadien ka jingleit phai jongka sha iing, ka shem ia ki jaiñ kiba u ju phong man ka sngi bad ha ka wallet jong u, ka shem ia ki kot ki sla bad ki pisa jong u, lait noh tang ia ki kot ki sla jong ka ophis jong u.
Nalor jong kitei ki tiar, la shem ba ka Computer, ka phone, u hard drive bad kiwei de ki tiar ba donkam jong u, ki la jah rngai lut na ka kamra ba u buh.
Na ka liang jong ka kot khubor La Jornada, la ong ba ki nongtrei jong katei ka shlem pathai khubor ki ju shah bud dien bad shah thmu pyniap teng ha ki por ba la leit, kynthup ia ka jingshah pyniap u Miroslava Breach ha u Lber jong u snem 2017 hapoh Chihuahua bad kumjuh ruh u Javier Valdez uba long u dkhot jong ka AFP bad uba la shah pyniap noh ha u Jymmang jong utei hi u snem hapoh Sinaloa.
Ka Mexico ka long kawei na ki ri kiba don jingma bha ha ka pyrthei bad ki kam sniew bad kam thombor ki long kiba jur ban ianujor bad kiwei pat ki ri. Naduh u snem 2000, ki don palat 150 ngut ki nongthoh khubor kiba la shah pyniap hapoh ka ri, kane ka long katkum ka kaiphod na ka Reporters Without Borders (RSF).
Kumjuh ruh ka sorkar Mexico ka la pyntip ba hapoh jong u snem 2022, ki don kumba 13 ngut ki nongthoh khubor jong ka ri kiba la shah pyniap. Tad haduh kine ki sngi, ia kito ki runar kiba don kti ha ka jingpyniap ia kitei ki nongthoh khubor, ym pat lah satia ban shim rai ne ban pynngat kyndon pynkheiñ aiñ namar ka long kaba eh ban leh kumta hapoh kane ka ri.
