Imphal, Naitung:
U Myntri ka sorkar kmie u Rajkumar Ranjan Singh uba ka ïingsah jong u ha Imphal ka la shah pynjulor bad shah thang da ka ding ha ki paidbah ha ka jingjia kaba la jia ha ka 16 tarik, Jylliew, u la ong ba ka seng Congress ka la dei ban shim ka jingkitkhlieh ha kaba ïadei bad ka jingmih jong ki jingïakynad ki bym shym la sangeh ha Manipur kaba la synshar da ka seng Congress naduh basdang u snem 2017 bad man ki jingbakla ba la leh da ki ki la long ka daw ba la wanrah ïa ka jingïakynad kaba jur ha ka jylla.
“Ka kam bamsap, ka jingbym lah ban synshar, ka jingduna ha ki rukom pyntreikam ban wanrah ïa ka roi ka par bad ka jingbym lah ban pyntreikam ïa ki jingdonkam ha ka pule-puthi ka la pynlong ïa ka Manipur ka jylla kaba dang sahdien,” la ong u Myntri sorkar ha ka jingïakren bad ki nongthoh khubor ha Thrissur.
U Singh, uba la mihkhmat ïa ka Inner Manipur Parliamentary konstitwensi, u la ong ba hadien ba la wan ha ka bor synshar, ka sorkar BJP ka la shim ïa ki sienjam na ka bynta ban kyntiew ïa ka Manipur ha kiba bun ki bynta.
“Ïa ki rukom pyntreikam thymmai ha kaba ïadei bad ka pule-puthi la pyntreikam na ka bynta ka jingthmu ban pynbiang ïa ki jingdonkam jong ki samla. Ka sorkar BJP ka la pyrshang ban kyntiew ha baroh ar, kata ha ki jaka lum bad ki jaka them jong ka jylla,” la ong shuh shuh u Singh uba long ruh u Myntri khynnah jong ka sorkar kmie uba dei khmih ïa ka External Affairs and Education.
Kum shi bynta ban pyrshah jur halor ka jingpynjari ïa ka Curfew ha ka miet jong ka 16 tarik, Jylliew, ka kynhun jong ki riewpaidbah kaba don ïa kumba 500 ngut ki shynrang bad ki kynthei ka la thombor ïa ka jaka sah jong u Myntri ka sorkar kmie ha Imphal bad thang ïa ki bynta kiba bun jong ka ïing jong u katba ki shipai pahara bad ki pulit pyllip ding ki dang tehlakam ïa ka jingpur sted jong ka ding. Ha kane ka por, u Singh bad ki bahaïing jong u kim don hapoh ïing.
