Guwahati, Naitung:
Ka kynhun Special Task Force (STF) jong ki pulit ka Assam ki la nangpynkhlaiñ shuh shuh ïa ka jingtohkit jong ki na ka bynta ban ithuh bad ban lap ïa ki runar kiba la donkti ha ka ban khaïi ïa u drok hapoh ka jylla.
Na ka jingïoh jingtip ba ki la don ki nongkhaïi drok ha Guwahati kiba la khaïi ïa u drok ha baroh kawei ka jylla, ka kynhunba dei khmih ka la pynlong ïa ka jingpyntreikam ban pynlong ïa ka jingleit khynra sha kylleng ki jaka ha ka 25 tarik, Jylliew ha kaba ha kane ka jingpyntreikam la ïatreilang ka kynhun STF hapoh ka jingkhmih u DIG (STF), Assam, u Partha Sarathi Mahanta.
Ha ka por ba la pynlong ïa kane ka jingpyntreikam kaba la long ha Hajo kaba don ha Kamrup, ka kynhun pulit ka la buddien ïa kawei ka kali kaba don ïa u Registration Number AS 01/DT 2876, ha kaba kane ka kali ka la pyrshang ban phet na ki pulit da kaba pynher sted ha ka surok ban poi sha Poa Mecca.
Na ka jingbym lah ban tehlakam, kane ka kali ka la hap noh sha ka riat kaba jylliew 100-150 phut.
Ka kynhun STF ka la lap ïa kane kali kaba la pynher sted na trai riat bad ka la pynlong ïa ka jingkhmih bniah.
Ha ka jingkhmih bniah, la lap ïa 100 tylli ki song sabon kiba don ïa u Heroin, uba don ka jingkhia kaba1.280 kilo.
Ha kane ka por, la ïohruh ban kem ïa uwei u nongkhaïi drok na ka jakaba la hap ka kali ïa uba la tip kyrteng kum u Md Dilwar Hussain.
Hadien kane ka jing-leit khynra bad ka jingleit thwet ïa kiba donkti sha kylleng ki jaka ka la ïai bteng.
