D. H. Kharkongor
Ka jingkylli ka mih mano na kita ki arliang mamla, kiba pynmih ne kiba sdang ia kaba kum kata ka huri huri lane ka jingkulmar, hangta ha Laitumkhrah. Ka jingkylli kaba bud ka long, kumba katno por ka sdang bad haduh katno por ka neh kata ka huri ka hura ne ka jingiakynnad ka jong ki. Te halor kata ka jingjia mano lane kaba kumno na kita ki arliang mamla kaba leit ban ‘file’ syndon beit noh da ka ‘FIR’, ha ka Laitumkhrah Police Station? Mano kata kawei pat ka kynhun kaba khang lad ne kaba sngew pyrshah ia kata ka jingleit ‘file FIR’ da kata kawei pat ka liang mamla. Mano ruh na kita ki arliang mamla kiba poi syndon katba kin ïa wiang ding ïa kata ka kali pulit bad pynjulor ruh ia kata kawei pat ka kali lem bad ïa kata kawei ka arshaka, ïa kiba la pynieng hangta hapoh ka Laitumkhrah Police Station ?
Ka mih namar kata sa ka jingkylli, uba kumno pat ruh uta u paid, uba don kumba 40-50 ngut. Udei ruh u paid u jong kano na kita ki arliang mamla bad uba wan poi nangno? Te hato u dei uta u paid, uba kumba 40-50 ngut, uba wiang ding bad pynjulor ïa kata ka kali pulit bad uba pynjulor ruh de ïa kata kawei pat ka kali lem bad ïa kata ka arshaka ? Lada u dei uta u paid uba wiang diang kumta ïa ka kali jong ki pulut bad pynjulor ruh ïa kata kawei pat ka kali lem bad ïa kata ka arshaka ba ym lah khlem da kylli da kumno ne da kano ka rukom uta u paid u wiang ding ïa kata ka kali bad pynjulor ruh ïa kata ka arshaka. Hato ka dei ba u pyndonkam da u ‘petrol bomb’ ban wiang ding ïa kita ki ar ki kali, kata, kat kum ba ki pulit ki suba ? Te hato ka dei ka kynhun ka jong uta u paid kaba shim pynban ïa ka aiñ halade ha ka jaka ba kin ailad ïa ki ‘pulit’ ba kin tohkit laitluid kumba dei ka rukom halor kata ka jingïakynad ?
Ka mih ruh ka jingkylli hato u dei ne em uta hi u juh u paid uba pyrshang ban knieh kumta ïa kita ki atiar jong uta/kita ki CRPF, uba/kiba ha ka jingïaid lynti ka jong u/ki sha la ka ‘CRPF camp’ ka jong u/ki,hadien ba u/ki la dep la ka kamram ? Ka mih ruh ka jingkylli u dei uei eh uta uba nud kat ban byrngem byrsit kumta ïa kat u Rangbah Pulit lane u Police Officer, kata ruh hapoh ka Police Station. Uta u dei u jong kano na kita ki arliang mamla?
U riewshai u ong to da tip shai ha kano ka por ban dih (kyiad) bad ba dei ban da jied shiah bha ruh bad kiba kumno ban ia dih lang.Ym tang kumta hynrei wat hangno ne ha kaba kum kano ka jaka ban ïa shong dih lang bad ki bad ruh haduh katno ban ïa dih. U Khawiang unlynshop tyngeh ïa uba dang lung than eh ka bor pyrkhat pyrdain kaba katno tam ia uba dang tlot ruh shaba palat ka bor halor lade ne ka ‘self-control’. Uba kum uta u dei ban kiar raimaw raidieng ia ka Kyiad, kaba katno tam lada ïa u dang ioh lad ban shong khet sa ka jingsarong biej ne ka ‘arrogance’. Ym dei ban tyrwa kyiad ïa kiba kum kita wei ba ki dei kiba kum kita (kiba imsngi ha kaba shu apthap ïa ka ioh dih ei) kiba mlien ruh ban dih shongshit, ban dih sarong bad ruh ban kob sarong. Ka dei na ka jingiadihlang bad kiba kum kita ba bunsien bunsien ju mihpat de ki jinghuri huri ne ki jingkulmar ne ki jngïashoh ki jingiadat.
Kat ban kynrup ne kat ban thmu ban knieh ïa ka atiar ka jong u CRPF te kam dei ka jingshlur ne ka jingshynrang mynsiem hynrei ka jingleh shlur biej lane ka jingsarong biej kaba namar ka jingshah lynshop pynban ialade ha u Khawiang. Ka dei ka jingshlur biej lem bad ka jingsarong biej kaba namar ba ïa don lang ruh shi kynhun. Ki shlur ki nud ruh tang ynda haba ki ïa don lang shi kynhunne kum ka kynhun bad ruh tad ynda ki la ïa dih ki la ïa bam katba kim iapher na u ksew pyndem tdongynda haba ki pynngad bad ki don tang weibriew. Ynda haba ki pyngngad bad ki don tang weibriew ba u tduh jong u tdong u jong ki uba ki pyndem ruh u da poi syndonshakmat bad tdiap tad haduh u sohpet u jong ki.
Isynnei shisha ïa ka jinglyngkot ka jingmut ka jingpyrkhat ka jong kito ki kobpia kiba ju mlien ban thaw jingkulmar ynda haba don bad la ka kynhun. Kiba pyrkhat ba ki dei ki “somebody’s special” ne ba kat ma ki bad kum ki te ym don shuh hangne ha sla pyrthei. Kiba pyrkhat ba ki long haloria ka aiñ.Kiba pyrkhat ba kampher wat lada kin pynkheiñ ia ka aiñ namar ba ki don ïa la ki ‘special ones’ ki jong ki. Ki ‘special ones’ kiba ym tang ba kin pynksan ne ‘bail out’ ia ki hynrei ki ban ïada (protect) kyrpang ruh ïa ki. Kiba kum pyrkhat ba long katba long ki te kin nym mynsaw bad kin nym ïap. Hynrei bunsien kam ju long kumta bad ki poi pynban kat ban shu khlad ei kha-ma-kha kumjuh kumba khlad lem noh kita kiwei pat ki bym don mano mano ruh ban iasaid bad ban ïada kyrpang ia ki. Ki da khlad noh ruh kum kita kiba ym don mano mano ba tip shaphang jong ki. Ym tang kumta hynrei shen shen ynda la tep ne la thang ia ki ba ka pyrthei ruh kam kynmaw shuh hi ruh ïa ki.
Wieh, kumba ong u Louis L’amour, ia la ka jong ka shympriah-kti ka jong phi ha ka um kaba ha ka khuri bad sa sei biang noh ruh ia ka. Te tang katto katba ka thiew kato ka um kaba ha kato ka khuri ba tang katto bad tang kumto hi ruh kata ka jingshongdor ka jong phi ynda haba phi la khlad lehnohei noh nangne na sla pyrthei. Kumta to da ïa husiar phi kiba sarong biej bad kiba shlur biej ia ka Kyiad ne ïa u Khawiang. Ynnai shongshit biej bad ynnai shlur biej wei ba ialade phi dang shah lyngshop pynban ha u Khawiang lane ha ka Kyiad, kaba katno tam lada kan pynjah burom syndon ruh plak ïa phi.
