Shillong, Naitung 11:
Ka nongbah Shillong ka la duh noh ïa ka lad ban pynlong ha ka sien kaba nyngkong eh ïa ka 132nd Durand Cup bad kane ka dei na ka daw ka jingbym biang madan ïalehkai.
Kane ka la wan hadien ba la pynbna ïa ka prokram ïalehkai ha ka Lah Sngi U Blei. Ïa kane ka lympung yn sdang naduh 3 tarik u Nailar haduh 3 tarik u Nailur ha Kolkata, Guwahati bad ha Kokrajhar.
Ha kane ka lympung ki don haduh 24 tylli ki kynhun ki ban ïashim bynta. Ka lahduh jong u snem ba la dep ka Bengaluru FC ka la shah kynthup lang bad ka Kerala Blasters lem bad ka lahduh jong u 2019 ka Gokulam Kerala ha ka Group-C, ka ban long ha Kolkata. Ka Indian Air Force ka la long ka kynhun kaba saw kaba la don lang ha kane kajuh hi ka group.
Ïa kine ki kynhun la phiah ha ki hynriew tylli ki group kiba don mar 4 tylli ki kynhun, katba lai tylli ha ka Group-A, B bad C, ki ban ïalehkai ha Kolkata. Kane ka nongbah kan ïoh ruh ban pynlong ïa ka jingïakhun final ha Vivekananda Yuba Bha-rati Krirangan (VYBK) ha ka 3 tarik u Nailur. Katba ki jingïalehkai jong ka Group-D bad Group-E, kin ïalehkai ha Indira Gandhi Athletic stadium ha Guwahati. Ka SAI Center Ground kaba ha Kokrajhar ka dei ka nongbah kaba thymmai ka ban ïoh ban pynlong ïa khyndai tylli ki jingïakhun, kynthup ïa kawei na ki saw tylli ki jingïakhun quarter-final.
Ki jingïakhun ki ban kham itynnad ha Kolkata kin dei ka jingïalehkai ‘derby’ hapdeng ki ar tylli ki kynhun ïalehkai Indian Super League (ISL) kata ka Mohun Bagan Super Giant bad ka East Bengal. Baroh ar kine ki kynhun ki la don ha ka Group-A kiba kynthup lang ïa ka Roundglass Punjab FC bad ka Bangladesh Army Team.
Kawei pat ka kynhun kiba khlaiñ bor na Kolkata ka dei ka Mohammedan Sporting kaba don ha ka Group-B ryngkat ki kynhun ïalehkai ISL ka Mumbai City FC bad ka Jamshedpur FC lem bad ka Indian Navy.
Ka NorthEast United FC kaba don ha ka Group-D kan ïalehkai ha la ïing (Guwahati) ryngkat ka FC Goa kaba la wan ba-ar ha ka ISL, lem bad ka Shillong Lajong FC, kaba la wanphai biang sha ka I-League.
Ha ka Group-E ki kynthup ïa ki ar tylli ki kynhun ïalehkai ISL kata ka Hyderabad FC bad ka Chennaiyin FC lem bad ka Delhi FC, kaba la kiew kyrdan sha ka I-League bad kawei ka kynhun na Nepal ka Tribhuvan Army Football Club.
