Shillong, Naitung 11:
Ka klob ïalehkai English Premier League ka Tottenham Hotspur ka la pynbna ha ka Sngi Ba-ar ba ka la lah ban pyndep ban soi ïa u Manor Solomon kum u rangïalehkai uba laitluid.
Une u rangïalehkai shapdeng ba dang 23 snem ka rta na Israel u la mynjur ïa ka kontrak kaba san snem bad kane ka klob.
Kham ha shwa u Solomon u la ïalehkai na ka Shakhtar Donetsk kaba dei ka klob na Ukraine. Hynrei na ka daw ka jingshah hiar thma ka Ukraine ha ka Russia, ka FIFA ka la ai jingbit ïa ki rangïalehkai ba kin pynkut noh ïa ki kontrak jong ki bad ki klob kiba na Ukraine.
Kumta u Solomon u la ïoh ban leit ïalehkai da ka ram (loan) sha ka Fulham, kaba long kawei pat ka klob ha England. Te mynta une rangïalehkai u la pynïasoh sha ka Spurs na ka bynta ban pynkhreh ïa ki lympung ïalehkai mynta ka aïom.
“U rangïalehkai na Israel u la mynjur ïa ka jingïateh kular ka ban kut haduh u 2028, kaba mut ba u la lah ban pyndep ïa baroh ki jingdonkam kum ka international clearance bad ka work permit,” la pynpaw ka Spurs kat kum ka kyrwoh.
Ha ka por ba u dang don ha ka Shakhtar, u Solomon u la ïoh ban ïalehkai 106 sien na ka bynta katei ka klob, kaba la khur jingjop ar sien ha ki lympung kiba la long ha katei ka ri. U la lah ruh ban pyni ïa ka jingtbit da kaba u la lah ban thep haduh 22 kol na ka bynta katei ka klob.
Haba ïadei bad ki lympung ïalehkai shabar ri, u Solomon u la ïoh ruh ban mihkhmat ïa ka Israel haduh 35 sien bad u la ïoh ban thep san kol.
Ha ka por ba u leit ïalehkai na ka Fulham, utei u rangïalehkai u la lah ban pynpaw ïa ka sap ïalehkai da kaba ïoh thep san kol ha ki lympung ïalehkai bapher bapher.
