Shillong, Naitung 11:
Kum shi bynta ban pynshlur bad ai mynsiem ïa ki heprit kynthei bad shynrang kumjuh ïa ki samla ban phaikhmat sha ka jingïalehkai Muay Thai, ka Mawkynrew Block Muay Thai Association ha ryngkat ka jingkyrshan lang ka Muay Thai Association of Meghalaya ka la pynlong da ka prokram ai jinghikai kaba lai sngi kaba la sdang ha ka 6 tarik bad kut pat ha ka 8 tarik mynta u bnai ha Mawkynrew.
Ha ka sngi pynkut ïa kane ka prokram ai jinghikai la wan ban ïadonlang da ka Dr. Amanda Pakynteiñ, kurim jong u MLA ka Mawkynrew u Bah Banteidor Lyngdoh kum ka kongsan nalor ki nongïalam ka Muay Thai Association of Meghalaya ba kynthup ïa u Bah Angelus Sun kum President, u Bah Pynsuklang Sumer kum Assistant Grand Master bad President ka Mawkynrew Block Muay Thai Association nalor kiwei pat.
La pynshongkun ïa kane ka sngi da ka jingwan ai mynsiem ïa ki heprit bad ki samla ba wan shah hikai da ki nongïalehkai Muay Thai kiba la wanrah nam bad burom ïa ka Jylla na ki lympung ïalehkai bapher bapher ba kynthup ïa u Pynnehbor Mylliem, u Blaseibok Kharbuli, u Skhemborlang Marweiñ bad u Babit Kharsahnoh.
Ki la don 57 ngut ki heprit ki samla kiba la wan ban ïashim bynta ha kaba na kine la jied 12 ngut sha ka Grade I lyngba ki syrnod bad kiba tam pat ki la ïoh ïa ki syrnod jingwan ïashim bynta jong ki.
