Agartala, Naitung:
Ka sorkar jong u Myntri Rangbah ka Tripura u Manik Saha ka la ïoh ban kurup ïa u drok uba la kot sha ka T. 101.66 klur ha ki lai snem ba la leit.
Ki la don palat 2,000 ngut ki briew kiba la donkti ha ka ban thied bad ban die ïa u drok ki la shahkem, u la ong.
U Myntri Rangbah u la ong ba ka sorkar Tripura ka la shim ïa kiba bun ki sienjam na ka bynta ban pynkhlaiñ ha ka ban ïakhun pyrshah ïa u drok.
“Ngi la buh ka jingkyrpad na ka bynta ban pynmih ïa ka shnat treikam jong ka Narcotics Control Bureau (NCB) ha Agartala. Ki la thmu ruh ban thied ïa ka Full-Body Scanner khnang ba lap ïa u drok ba la buhrieh ha kaba ïadei bad ka jingthmu ban khaïi sha kylleng ki jaka. “
Ha kaba ïadei bad ka jingai jubab halor ka jingkynrei jong ki kam sniew kiba mih na u drok, ka Tripura Crime Branch ka la thaw ïa ka kynhun Special Investigation Team (SIT) khnang ban lap ïa ki kynhun ba ju khaïi drok, ki nongthong pisa bad kito kiba la don bynta ban die ïa u drok sha kylleng ki jylla.
“Ka sorkar jylla ka la batai shai ïa ki rukom pyntreikam kumno ban lap ïa ka jaka ba la sdang ha ka ban pynmih ïa u drok bad la shim ïa ka rai ban pynshitom tyngeh ïa ki,” la ong u Saha.
Ha kaba ïadei bad ka jingthmu ban ratdyngkhong ïa u drok na ka jylla, ka sorkar ka la rai ban nang ïai bteng ha ka ban shim ïa ki sienjam khnang ban lah ban pynduh jait ïa u drok bad ban ïohkem ïa kiba la donkti ban khaïi drok.
