Islamabad, Naitung:
Ka tnat National Disaster Management Authority (NDMA) jong ka Pakistan ha ka Sngi Ba-ar ka la pyntip ba kumba 86 ngut ki la duh noh ia ka jingim bad palat 151 ngut pat kiba la mynsaw na ki jingjia bapher namar ka jingjur jong u slap ba khlem sangeh ha ki katto katne ki bynta jong ka ri naduh ka 25 tarik jong u Jylliew ba la lah.
Katkum ka kaiphod ba la ioh na ka tnat NDMA, la iathuh ba 6 ngut ki briew ki la khlad noh bad kumba 9 ngut pat kiba mynsaw ha kylleng jong ka ri hapoh jong kine ki 24 kynta ba la leit.
La ong ruh ba kitei ki 86 ngut kiba khlad baroh, ki kynthup ia 16 ngut ki longkmie bad 37 ngut ki khyllung- khynnah.
Ha kajuh ka por ruh la ong ba palat 97 tylli ki iing kiba la julor bad shah pynjor noh ha ki bor ka mariang namar jong utei u slap uba khlem sangeh hapoh ka ri.
Ka Punjab Province ka long ka thaiñ kaba mad buh eh ia ka jingduh nong naba 52 ngut napdeng jong kitei kiba khlad, ki dei na Punjab. Katba 20 ngut pat ki dei na ka distrik Khyber Pakhtunkhwa bad 6 ngut na Balochistan.
Naduh u Iaiong, ka tnat NDMA ka la maham lypa ba kumba 72% la ithuh lypa ba ka Pakistan kan ioh mad ia u slap uba jur bad ki jingshlei um ha kylleng ki bynta jong ka ri hapoh jong une u snem 2023.
