Kyntu ka AMKA ïa ki kmie ki kpa jong ki khynnah ba kim dei ban kulmar jingmut

Ïa kane ka synjuk la pynrung kyrteng ha u snem 1987. Ka la ïoh ïa ka jingithuh na ka All India Karate-Do Federation (AIKF) ha u snem 1988.

Shillong, Naitung 11:

Ka All Meghalaya Karate-Do Association (AMKA) ka la kyntu ïa ki kmie ki kpa jong ki khynnah ïalehkai karate ba kim dei ban kulmar jingmut hynrei ki dei ban ïai bteng ban ïasnoh kti lang bad ka synjuk na ka bynta ban kyntiew ïa ki khynnah ha ka kam ïalehkai.

Kane ka jingkyntu ka la wan hadien ka jingwan mih paw dangshen sa kawei pat ka synjuk, ka Meghalaya State Karate-Do Federation (MSKDF) kaba la pynkulmar jingmut ïa kiba bun ki kmie ki kpa namar kim sngewthuh shuh kano kaba dei hok kata ka synjuk ïalehkai kaba lah ban btin lynti ïa ki khun jong ki ha kam ïalehkai karate.

Ïa ka AMKA la seng naduh u snem 1981 bad haduh mynta ka la ïaid haduh 40 snem. Kane ka synjuk ka la lah ban sei ïa bun bah ki nongïalehkai kiba kynsai kiba la paw ym tang hapoh ka ri, hynrei wat shabar ri ruh kumjuh.

Ïa kane ka synjuk la pynrung kyrteng ha u snem 1987. Ka la ïoh ïa ka jingithuh na ka All India Karate-Do Federation (AIKF) ha u snem 1988. Hadien kane ka la sdang ban ïaid shakhmat hapoh ka jingïalam u (L) Bah Sensei Stephan Leong. Ha u 1993 ka AMKA ka la ïoh ruh ka jingithuh na ka Sorkar Jylla bad kumjuh na ka State Sports Council of Meghalaya bad ha u snem 1996 da ka Meghalaya State Olympic Association (MSOA). Haduh mynta ka AMKA ka dang hap hapoh ka jingithuh da ka MSOA.

U President ka AMKA u Bah Hunlang Lytan u la ong, “Ki paidbah ki tip bha ba ka AMKA ka la ïaid haduh 42 snem ha ka ban kyntiew ïa ki nongïalehkai karate ka Jylla. Haduh mynta ngi la lah ban pynmih ïa bun bah ki nongïalehkai kiba la paw ha ki lympung hapoh ka ri bad wat shabar ri ruh kumjuh kiba la wanrah burom ïa ka Jylla hi baroh kawei. Hynrei mynta la wan mih paw sa kawei pat ka synjuk bad kiba bun ki kmie ki kpa jong ki khynnah ki la sdang ban kulmar jingmut halor kane ka bynta.”

Ki nongïalehkai karate hapoh ka lama jong ka AMKA ki la ïoh ban leit ïashim, ha kaba don na ki kiba la khur takma ha ka National Games bad ka SAFF Games. Ka kynhun ïalehkai jong kane ka synjuk ka la wan ba-ar ha ka 2nd North East Olympic Games 2022. Dangshen ka samla Saralin Rynghang jong ka AMKA ka la shah jied ban leit sha ka jingpyrshang khnang ban ïoh ïa ka lad ban mihkhmat ïa ka ri India ha ka Asian Games.

Ka AMKA ka la shim khia ruh naduh ki khynnah kiba dangrit rta da kaba seng ïa ki shlem ai jinghikai kylleng ka nongbah. Kane ka synjuk ka la ju pynlong manla u snem ïa ki lympung ïalehkai Inter School Championships bad ruh ki lympung State Level Championships ha kaba la ju iashim bynta naduh ki sub-junior, junior haduh ki senior.

Nalor ba la lah ban pynlong ïa shibun ki lympung ïalehkai bad ki prokram ai jinghikai, ka AMKA ka la ju ïoh ruh ïa ki lad jingïarap na ka tnat ïalehkai jong ka Sorkar Jylla.

Halor kane ka jingjia, na ka liang ka AMKA ka la phah da ka jingthoh sha ka Sorkar Jylla ha ryngkat ka copy sha ka MSOA bad la sngewthuh ba ka executive council jong ka MSAO kan sa shong jingïalang na ka bynta ban pynbeit ïa kine ki kynrum-kynram.