Shillong, Naitung 11:
Ka Marketa Vondrousova ka la jam sha ka semi final ha ka Wimbledon hadien ba ka lah pynliem noh ïa ka Jessica Pegula na America da 6-4, 2-6, 6-4 ha ka Sngi Ba-ar.
Da kane ka jingjop katei ka nongïalehkai na Czech Republic kan pynkhreh ïa ka jingïakhun semi final pyrshah ïa ka ’thei ïalehkai na Poland kaba bat ïa ka kyrdan ba nyngkong ha ka pyrthei ka Iga Swiatek lane ka khlur ïalehkai na Ukraine ka Elina Svitolina.
Ha kaba sdang jong ka quarter final ka Vondrousova kaba dang 24 snem ka rta ka la ïaryngkat mar 4-4 hadien ba ka Pegula ka la sdang ban hiar ha ka rukom ïalehkai.
Katei ka ’thei ïalehkai na Czech Republic ka la lah ban pynpaw ïa ka jingtbit na ka bynta ban jam sha ka semi final kaba nyngkong eh ha ka Grand Slam naduh ba wan ba-ar ha ka French Open ha u 2019.
Kham hadien ka Pegula ka la sdang ban ïakhun tyngeh ha kaba ka la ïoh ban tam da 4-1 bad hadien katei ka nongïalehkai na America ka la tam biang da 5-2.
Ha shwa ban kut ka jingïalehkai, ka Vondrousva ka la sei bor bah kat haduh ba ka la lah ban pynliem ïa ka liang pyrshah da 5-4 na ka bynta ban khur syndon ïa ka jingjop.
