Ha kine ki sngi, ngi ïohi sa tang ki jingjia ba sngewtriem. Ka jingshah pynïap klep, jinglap metïap bym don shuh ka khlieh, jingïap sha ki lum ki wah, jingkhlad na ka jingbam tit, jingïakynad ba har rukom khlem da ïakren shuh ïa ki kam tuh kam thiem kiba la jyllei haduh katta katta. Kaei tharai ka daw kaba pynlong ïa ki katto katne ki briew ba kin leh ïa kaei kaba ki la leh? Ïa kiba kum kita ki briew dei ban phah peit bniah ruh ha ki doktor ba sumar ïa ka jingmut jingpyrkhat bad ym tang ban shu set along ïa ki. Hap ban sngewthuh ïa ki daw tynrai wat la ka aiñ kam dei ban map ïa ki nongleh ïa ki kam bymman khamtam kiba donkti ha ka jingpynïap briew ne jingleh be-ijot ïa ka longrynïeng ka manrynïeng ki kynthei khynnah.
Ha kaba ïadei bad ka jingkhlad jong ki briew sha lum sha wah, ki nongshong shnong ki dei ban sngewthuh ba ha kum kine ki por lyiur, ka long kaba ma ban leit ruma khlem da tip bha ïa ka jaka. Ngim lah ban tip lypa lano u slap un ther tyngeh ha kato ka jaka kaba ngi leit. Lada ngi sniewbok, ngi shu ngat ei ha ka apot sepsngi. Kata ka jingleit khwai ha kum kane ka por sha ki wah bah ka buh jingma shibun ïa ka jingim briew. Ngim dei ban kheiñ sting ha ki por kiba kum kine. Ngi dei ban ap ynda la kham thanda u slap. Ha kaba ïadei bad ka jingkhlad jong ki briew ha lynti syngkien, ngi sngewdei ban kyntu ïa ka sorkar bad ka tnat PWD ba kin buh bha da ki jingthoh bad ki dak ha lynti-lynti khnang ba ki nongñiah kin sngewthuh ïa ka rukom ïaid jong ki. Ha ki jaka ba long khun lane ba long riat, dei ban don da ki jingthoh kiba shai kiba long kum ki jingmaham ïa ki nongñiah. Nalorkata, dei ban don ki jingker mawkynroh ha ki surok kiba khim bad kiba buh jingma khnang ba kan lah ban ïada na ka jinghap ki kali sha riat. Ki nongñiah ruh ki dei ban long kiba adkar bad ym ban shu leh thurmur khamtam sha ki jaka ba ki dang leit thymmai namar kim pat sngewthuh ïa ka jinglong jong ka surok.
Haduh ka 2 tarik Naitung, ka jingjur slap ha kane ka jylla ka la ktah jur ha kaba 12 ngut ki briew ki la khlad tang hapoh shibnai kata naduh ka 1 tarik Jylliew haduh ka 2 tarik Naitung, bad kumba 36 tylli ki jingtei jingshna kynthup ki surok ki la shah pynjulor na ka jingjur slap. Katkum ka jingbuh jingthoh ka State Disaster Management Authority (SDMA), ki la don 213 tylli ki shnong bad palat 26,000 ngut ki nongshong shnong ki la shah ktah haduh mynta. Ki briew kiba la khlad na ka daw ka jinglynshop ki bor mariang naduh ba la bteng ka jingjur slap ki long 12 ngut haduh mynta ha baroh kawei ka jylla, katba kiba dang jah rngai ki don 2 ngut. Ki mrad kiba la ïap na ka jingshah rong ha ka um, jingshlei um bad shahtied ’leilieh ki long 32 tylli. Ki jingtei jingshna kynthup ki surok kiba la twa bad jur ka jingjulor namar ka jingjur slap ki long 36 tylli. Kine ki dei ki jingjia na ka daw jong ki bor mariang kiba la wan lynshop ha kane ka lyiur kaba dang ïaid haduh mynta.
Ngi ïohi ruh ïa ka jingkhlad bad jingshitom jur jong ki para nongshong shnong na ka jingbam tit. Na u snem sha u snem kine ki jingjia ki ju kynrei bha namar ki briew kim sngewthuh ne tip uno u tit uba long ban bam bad uno uba long bih lada bam. Ngi sngewthuh ruh ba ka bih ha ki tit ki bym long ban bam ka shyrkhei haduh katta katta namar ki la bun ngut kiba khlad ha kine ki snem bad kiwei pat ki la don hapdeng ka jingshitom kaba jur. Namarkata, ngi sngewdei ban kyntu lem ïa ki para nongshong shnong ba kim dei ban ïa bam kulmar ïa ki tit khlem da tip bha shwa la ki long ne em ban bam. Nalorkata, ki don sa ki kam pynïap briew kiba shyrkhei bad dang ha kine ki sngi, ki pulit ki la ïoh tam ïa kawei ka metïap ha ka thaiñ Umïam bad kane ka met ka dei ka bym don shuh ka khlieh. Sa uwei pat u samla u la khlad na ka jingshah shoh ha ki briew ki bym lah ban ithuh ha Lad Umroi. Ngi la ïohi ruh ba ka jingïakynad jong ki ar kynhun ka la ïalam shaduh u pud jong ka jingshah wiang ding ka kali pulit ha thanat Laitumkhrah. Ïa kiba kum kine ki kam sniew kam smeh, ngi ngeit ba kito kiba pyntreikam ïa ka aiñ kin sa leh ïa kaba donkam.
Hynrei ka long ruh kaba pynsuhjer ban tip ba ki don ki briew ki bym salia shuh ban shim ïa ka jingim jong ki para briew. Shano kata ka jingsheptieng? Shano ka jingïatiplem? Hato ym long shuh ban ïakren ïapynbeit da ka ktien haduh ba hap ban shim syndon ïa ka jingim? Ngim don hok ban shim ïa ka jingim jong kiwei pat namar ha kane ka pyrthei shai, ka don ka aiñ ka kanun bad ki ïingbishar. Lada don ka jingïakajia, leit tied ïa ka jingkhang jong ki bor ba pyntreikam ïa ka aiñ lane ki ïingbishar bad ym ban shim hi halade ïa ka aiñ.
