Shillong, Naitung 11:
Ka Kharang SC bad ka Mawkasiang SS&CC ki la khur ïa ka jingjop kaba nyngkong ha ka lympung ïalehkai Fourth Division (U-20) Football League 2023 ba la pynïaid da ka Shillong Sports Association.
Ha kane ka jingïakhun jong ka Group-B kaba la long ha ka Sngi Ba-ar ha madan Polo, ka Kharang ka la lah ban pynliem noh ïa ka Madanrting SC da 2-1 kol. Kane ka la wan urlong lyngba ki kol u Jamshaphrang Kharsati (44) bad u Labonstar Tarow (65), katba na ka liang ka Madanrting la pynphai shi kol da u Evening Tariang (56).
Ha kawei pat ka jingïakhun ba ar, ka Mawkasiang SS&CC ka la pynliem noh ïa ka Laitumkhrah SC da 2-0 kol. Ïa kine kol la thep da u Klestern Roy Nongrum (18) bad u Donald J. Nongkhlaw (70).
Haba phai sha kiwei pat ki ar tylli ki jingïalehkai jong ka Group-A kiba la pynlong ha ka Lah Sngi U Blei, ka Madan S&CC ka la khur ïa ka jingjop hadien ba ka lah ban pynliem noh ïa ka Ïatyllilang SC da 3-0 kol. Ïa kine kol la thep da u Emanbha Marbaniang (1), Arbandelness Khongsngi (53) bad u Milli August (74). Ha ka jingïakhun kaba la long hapdeng ka Dilingiem YSCWA bad ka Lumpyngngad SC ki la ïasam mar shi dor-thong (point) hadien ba kim shym lah ban thep kol haduh kaba kut ka jingïalehkai.
Kane ka lympung kan bteng biang haduh ka 19 tarik mynta u bnai. Kumta na ka liang ki bor pynïaid ka SSA kin bteng shwa da ka Women Football League 2023 ha ka Sngi Balang da ka jingïakhun hapdeng ka Kick Start Academy pyrshah ïa ka Umpling SC ha ka por 2:30 noh phai sngi, katba ka Mawkriah West SC ïa ka Lawei SC ha ka por 4:15 janmiet.
