Shillong, Naitung 11:
Kumba 500 ngut ki nongïalehkai kiba na Russia bad Belarus kin ïoh ïa ka lad ban ïashim bynta ha ka Asian Games ka ban long mynta u snem, ïa kane la pynbna da ka Olympic Council of Asia (OCA) ha ka jingïalang kaba la long ha ka sngi Saitjaiñ
Baroh ki nongïalehkai kiba na Russia bad Bela-rus kin ïalehkai hapoh ka jinglong laitluid (neutral flag) bad ym shah ban mihkhmat ïa ka ri jong ki, kynthup ïa ka jingpyntem jingrwai na ki ri jong ki.
Kane ka rai ban kynthup ïa ka Russia bad ka Belarus ha ka Asian Games ka long ban ïarap ïa ki ha kaba kin ïoh rung sha ka Paris Olympics ka ban long ha u snem ban wan.
Ïa katei ka Asian Games yn sdang naduh 23 tarik u Nailur haduh 8 tarik u Risaw. Kane ka lympung ka long kum ka lympung ban ïaknieh rung sha ka Olympic ha kiba bun ki jingïalehkai kum ka wrestling bad shooting.
Ki nongïalehkai kiba na Russia bad Belarus ki la shah sospon ban ïashim bynta ha ki lympung ïalehkai bar ri naduh u Lber jong u snem 2022 hadien ba ka Russia ka la hiar thma ïa ka Ukraine. Namar ka jingïaleh thma jong kitei ki ar tylli ki ri kaba la pynlong ïa ki nongïalehkai ban duh ïalehkai ha ki lympung ïalehkai kiba ha Europe, kiba long ki lympung ïaknieh rung sha ka Olympic, kane ka rai ba la shim bynta ka OCA ka long ban plie lad ïa ki lyngba ka lympung ïaknieh ha Asia.
Ka International Olym -pic Committee (IOC) ka la plie lad ïa ki nong-ïalehkai kiba na Russia bad Belarus na ka bynta ban ïashim bynta ha ka Paris Olympics ka ban long ha u Jymang mynta u snem, hynrei la pynkhreh ïa ki kyndon kiba pyr-khing, kynthup ïa ka jingbym lah ban ïoh ïa ka shap jong ka ri jong ki.
Watla la ailad ïa ka Russia bad ka Belarus ban ïashim bynta ha ka Asian Games, hynrei ym pat shym la rai ha kino ki jingïalehkai ba ki lah ban ïashim bynta.
