Shillong, Naitung 12:
Ka Social and Economic Life Development Department (SELDD) jong ka Khasi Jaiñtia Presbyterian Synod Sepngi lyngba ka Agency for Sustainable Development Initiative (AFSDI) kan pynlong ïa ka Shillong Run- 10K, 2023 ha ka 12 tarik u Nailar mynta u snem ha kane ka nongbah.
Ka phang pdeng jong kane ka jingmareh ka long ‘Run with different abilities” bad ka jingthmu ka long ban pynsngewthuh ïa ki jingeh bad ïa ka jinglong ryngkat dor ki briew ba don jingduna ki dkhot met bad ruh ban pynmih pisa na ka bynta ki projek kiba ka Synod ka la seng na ka bynta ki khynnah kiba don ki jingduna ha ki dkhot met, kata Mairang Vidyajyoti Inclusive Secondary School bad ka Community Based Rehabilitation Centre kiba don ha Mairang lem bad Rev. Amirkha School for Disabled kaba don ha Mawlai.
Ïa kane ka Shillong Run la sdang naduh u snem 2011 haduh 2019. Ha kine ki khyndai tylli ki snem kiba la dep ka jingpynlong ïa ka Shillong Run ka long kaba ïaid beit ïaid ryntih bad ki nongïashim bynta kiba kham bun ki dei ki khynnah skul wat la ki rangbah ruh ki ïashim bynta bha.
“Naduh u 2020 haduh u 2022 ngim shym la lah ban pynlong na ka daw jong ka khlam COVID-19, hynrei mynta u snem ngi la thmu ban pynlong ha ka rukom pynïaid kaba kham pher,” la pynpaw u Rev. S.C Diengngan uba long u Chairman ka AFSDI ha ka jingïalang bad ki nongthoh khubor ha ka sngi Balang ha Shillong Press Club.
U la ïathuh ba na ka bynta kane ka jingmareh, ki nongïashim bynta ki lah ban pynrung kyrteng ïalade lyngba ka Online da kaba shu scan ïa u QR Code’ uba ki la buh ha ki Flyer bad ki Banner. Katba ka Offline Registration ka long ba ki nongshim bynta ki lah ban leit shim ïa ki Form na ka shlem treikam jong ka KJP Synod Sepngi kaba ha Mission Compound, Shillong.
Shuh shuh u la ïathuh ba la buh ruh ïa bai pynrung kyrteng ha la ki jong ki dor kat kum ki kyrdan ïakob, kata 8-15 snem, 15-18 snem, 18-35 snem, 35- 45 snem, 45- 55 snem bad 55 snem shaneng jong ki shynrang bad kynthei.
“Na ka bynta ki briew ba don jingduna ha ki dkhot met yn don tang ar kyrdan ïalehkai kata hapoh ka 15 snem (Junior) bad shaneng ka 15 snem (Seniors) bad ym donkam ban siew bai pynrung kyrteng ïa ki. Ïa ka Chest Number la buh da ka Timing Chip ryngkat ki ar tylli ki Timing Machine,” la bynrap u Rev. S.C Diengngan da kaba ong ruh ïa ka tarik kaba khatduh na ka bynta ban pynrung kyrteng kan long ha ka 31 tarik mynta u bnai.
Ki lynti na ka bynta kane ka Shillong Run ha ka kyrdan Senior (18 snem shaneng) kan sdang na Parking Lot, Polo Ground – Jingkieng (Polo Bazar) – Lad Lawmali – Jaïaw Jingthangbriew – Jaïaw Mawbynna – Jaïaw St. Joseph – Jaïaw Pdeng – Lad Jaïaw Lansonalane – Jaïaw Shyiap – Riatsamthiah Presbyterian Church – Umsohsun Road – Sani Mandir (GS Road) – 9-Lad – Raj Bhavan – Barik – Dhanketi – Don Bosco Square – Shillong Commerce College – PGT College – B.K. Bajoria School – 4th Furlong – Polo Bazaar bad ban pynkut ha Parking Lot, Polo.
Katba na ka bynta ki Junior (hapoh 18 snem) lem bad ki nongïashim bynta napdeng kiba don jingduna ha ki dkhot met yn sdang na Parking Lot, Polo Ground – Jingkieng (Polo Bazaar) – Lad Lawmali – Jaiaw Jingthangbriew – Jaïaw Mawbynna – Jaïaw St. Joseph – Jaïaw Pdeng – Lad Jaïaw Lansonalane – Jaïaw Shyiap – Riatsamthiah Presbyterian Church – Umsohsun Road – Sani Mandir (GS Road) – 9-Lad – Pegasus – Hotel Polo Towers – Polo Bazaar bad ban pynkut ha Parking Lot, Polo.
Ki bor pynïaid ki la pynkhreh ruh ïa ki khusnam pisa na ka bynta ki nongjop lem bad ki takma sha ki nongïashim bynta baroh kiba lah pyndep ïa ka jingmareh ryngkat ki syrnod. “Ngi la pyrshang ban pynheh ïa ki khusnam pisa khnang ban khring ïa ki nongmareh da kaba ngi la buh ïa ka kyrdan ïalehkai naduh 18- 35 snem kum ka Open Category ïa ki shynrang bad kynthei, kata ka long T. 50,000/- ïa kiba wan ba nyngkong, T. 30,000/- ïa kiba wan ba-ar bad T. 20.000/- ïa kiba wan balai. la kiwei pat ki kyrdan kan don ka trophy ryngkat ki khusnam ba kynthup ia T. 5.000/- ïa kiba wan ba nyngkong, T. 3,000/- ba-ar bad T. 2.000/- kiba wan balai.”
