Nongstoiñ, Naitung 12:
Ka West Khasi Hills District Badminton Association (WKHDBA) ka la pynkhreh shaid-shaid na ka bynta ka lympung ïalehkai Badminton ba la tip kum ka 38th Meghalaya State Badminton Championship 2023 ka ban long ha sor Nongstoiñ ïa kaba la pynlong da ka Meghalaya State Badminton Association (MSBA).
U Bah S. Lyndem, Working Chairman ka Organising Committee ha kajuh ka por kum u President ka WKHDBA, ha ka jingdonlang ruh u Bah H.K. Thabah (MCS) Chairman ka Organising Committee, u Dr. L.L Mawsor, Organising Secretary, Bah G.J.L. Sangriang, Chairman Media cum Publicity Committee haba ïakren ha ki lad pathai khubor ha ka sngi Balang u la ong ba ïa katei ka lympung yn pynlong ha Indoor Stadium Nongstoiñ ha ka 2 tarik haduh ka 5 tarik u Nailar mynta u snem.
Shuh shuh u la ïathuh ba ïa kane ka lympung la pynïaid bad pdiang da ka WKHDBA ha ka jingïatreilang bad ka MSBA. Nangta u la pynpaw ba ha kane ka kynti kaba mynta la khmih lynti ba ki nongïalehkai na baroh ki 12 tylli ki distrik ka Jylla kin wan ïashim.
U la ong ruh ba ka tarik kaba khaduh ban pynpoi ïa ka jingpynrung kyrteng kan long ha ka 20 tarik u Naitung 2023 bad ïa ka jingpynrung (entries) ki hap ban phah sha u General Secretary ka MSBA.
Nalor kane, u la ong ba ha kane ka lympung kin don haduh san tylli ki kyrdan ïalehkai kita ki long ka Under-13, Under-15, Under-17, Under-19 bad Senior jong ki kynthei bad shynrang.
Nalor kata, u la ong ba ka jingpynkhreh ka long kaba la ïaid shaid-shaid bad na ka bynta kane ka lympung ki don lai tylli ki courts bad ka jingpynkhreh ïa ka stadium ka la ïaid shakhmat namar ba ha kine ki snem ba la dep haba peit ïa ka jinglong jingman jong ka stadium shisha ka la i noh mynsiem namar ka ka jingbym biang ha ka bording bad kiwei ki jingdonkam.
Kumta na ka liang ki nongïalam ka MSBA ki la leit ban kyrpad ïa ka State Sport Council of Meghalaya bad ha ka por ba lyngkot ki la lah ban pynbiang ïa baroh ki jingdonkam. Mynta ka kam ka la ïaid shaid-shaid bad khmih lynti ba ha shwa ban sdang kane ka lympung yn lah ban pyndep ïa baroh ki jingdonkam.
U la ïathuh ruh ba ka jingsam khusnam sha ki nongjop ha kane ka lympung kan long da ka song pisa ka ban kot haduh T. 1 lak nalor ki trophy bad ki syrnod.
