Arguineguin, Naitung:
Ki bor pahara duriaw jong ka Spain ha ka Sngi Nyngkong ki la ïoh ban pyllait im ïa 86 ngut ki phetwir na Sub-Saharan Africa hajan jong ka Nanary Island. Kane ka long hadien ba la ïohi ïa ka jingdon jong ki ha katei ka bynta da ka liengsuiñ pahara. Ka Salvamento Maritimo ka la pyntip ba ki briew jong katei ka tnat ki la ïohi ïa kawei ka lieng heh kaba kit ïa 6 ngut ki kynthei bad 80 ngut ki shynrang ha katei ka sngi. Katba ki kynhun iarap ki dang wad pat sa ïa kawei ka lieng kaba kit ïa katto katne ngut ki phetwir kaba la dei ban poi sha katei hi ka jaka bad kaba don ïa kumba 200 ngut ki briew kiba shong ha ka.
Hynrei, ki bor pyniaid ka Spain kim shym la lah ban bata ïa ka snem jong baroh kitei ki phetwir ba la ïoh ban pyllait im.
La ong ba ha katei ka sngi, ka liengsuiñ jong ka tnat pahara duriaw ka la ïohi ïa katei ka lieng kumba 71 mile na ka phang South jong ka dew lynnong Gran Canaria, la ithuh ruh ba katei ka lieng ka lah ban kit kumba 200 ngut ki briew.
Kumta, ki bor pahara ki la ïoh ban leit shaw bad pyllait im noh ïa kitei ki phetwir ba sahkut ha katei ka bynta hajan ka dew lynnong bad la ïoh ban kyntiew noh ïa ki ha kawei pat ka jhad jong ka tnat iarap.
Hynrei la ong ba katei ka liengsuiñ pahara kam shym la ïohi ïa katei kawei pat ka lieng kaba dang jah rngai bad kaba la mih ryngkat ha kajuh ka por bad katei ka kynhun ba la ïoh ban pyllait im.
