Shillong, Naitung 12:
Ka Lawei Smit SC ka la pynliem noh ïa ka Mawkriah West SC da 6-0 kol na ka bynta ban khur ïa ka jingjop kaba nyngkong ha ka SSA Women’s League ha ka sngi Balang ha madan Third Ground, Polo.
Wat la ka Lawei Smit SC ka la mad ïa ka jingshah rem arsien bad ïakhaid shisien, hynrei ha kane ka jingïakhun kaba saw jong ka Group-A ka la lah ban pynpaw ïa ka jingtbit ha kaba ka la ïoh ban pynkhih jar tang mar ïasdang ka jingïalehkai lyngba ka Innocia Tympuiñ ha ka minit kaba nyngkong.
Hashwa ka shiteng kynta kane ka kynhun ka la thep biang sa ar kol lyngba ka Fedilia Lamare (28) bad ka Airilang Khongsit (29) na ka bynta ban tam 3-0 kol ha ka kylla step.
Ka Lawei Smit SC ka la ïoh ban thep kol biang lyngba ka Barikor Kurbah ha ka minit kaba 43. Kumjuh ka Airilang ka la ïoh ban thep ïa ka kol ba ar ha ka minit kaba 46 bad ïa ka kol kaba khatduh la thep da u Jidalin Tumpuiñ (70) na ka bynta ban khur syndon ïa ka jingjop.
Haba phai shah kawei pat ka jingïakhun jong kane kajuh hi ka group, ka Kick Start Football Coaching Centre ka la pynliem noh ïa ka Umpling SC da 1-0 kol na ka bynta ban khur ïa ka jingjop kaba nyngkong.
Kane ka nam jop ka la wan urlong lyngba ka shi kol ba la thep da ka Daiamon Makroh ha ka minit kaba 16.
Lyngba kine ki jingjop, ka Lawei Smit SC bad ka Kick Start Academy ki la ïaryngkat mar 4 dor-thong (point) na ka bynta ban shong ha ka kyrdan balai bad basaw. Hynrei kine baroh ar kynhun ki la duh ïa ka lad ban jam sha ka semi final.
Ka jingïalehkai jong ka Group-B ha ka sngi Palei kan long hapdeng ka Kharang SC pyrshah ïa ka Maw U-Tieng SC ha ka por 2:30 noh phai sngi, katba ka Ïasnohktilang Madanrting FC ïa ka Synroplang 77 ha ka por 4:15 janmiet.
