Raphael Warjri
Ka jingmih jong ki dak thoh ktien (alphabet) Jaintia ka dei ka ba la pynlynga ïa ki paidbynriew salonsar ha Ri Khasi bad don ruh kiba bynñiaw namar ba ka kyrsoi tang na ki kynrem lyndan jong ka sor Jowai bad la thung ruh ha ka shlem Dorbar Dalariti (District Council) ba la phiah ban korbar ïa ka Raijbah (district) Jaiñtia baroh kawei. Nangta la pynmih ruh ha ka kyrwoh dulir sorkar jylla bad ka la neh bad shong aiñ ha ka thoh ka tar ïa ka ktien Pnar kaba la kam kum ka ktien Jaintia. Kiwei kiwei ki thaiñ palat na sor Jowai, ha kum sha Raijbah Jaintia Rilum Mihngi (East Jaintia Hills District) sha War Jaintia bad shatei na ka Raijbah Jaiñtia Rilum Sepngi ruh kim pat pdiang ha kino kino ki jingthoh la ha ki skul, ki kot ba pynmih paidbah kynthup ruh ha ki shlem pathai khubor. Lada jurip sani lei lei wat ha sor Jowai ruh ym pat pdiang salonsar namar ba la don lypa ki dakthoh ktien ba la pyndonkam mynta la jan dap arspah snem naduh ba ai pateng u Thomas Jones. Lada buddien ïa ka khana mynnor u Thomas Jones u la buhti naphang ia ki dak ktien phareng (English Alphabet) khlem da weng ïa ki dak ki ba ym donkam ha ka ktien Sohra ha kata ka por. ïa kane lah ban sabut na ka kot Khasi ba nyngkong jong u Thomas Jones kaba la jer Ca Citab ban Hicai Ca Citien Cassia ha ka snem 1842. Na ka daw ba ka ktien Khasi na Sohra ka long kaba la duriap u Thomas Jones ha ryngkat ki nonghikai Khasi jong u, u Junkha, u Doowan Rai bad u Laithat ha kaba thoh bad pynmih kot, lehse ka la don ka jingsngew ban pynbiang shuh shuh ia ki dak katkum ka rukom thoh bad ha ka snem 1852 pat la pynbeit noh ia ka kyrteng ‘Ka Kitab Nyngkong ban pule ka ktin Khasi’ katkum ba la sot na ka jynthoh u William Pryse. Kham hadien ha u snem 1896 u Jeebon Roy u la kynthup sa ia u ‘ï’ bad u ‘ñ’ ha ki dak thoh ktien Khasi. Lah ban long ba la weng noh ia kito ki dak ba ym donkam ha ka ktien Khasi khlem da bishar ia kiwei kiwei ki ktien na ki thaiñ ha kylleng ka Ri Khasi. La kumno kumno ka ktien Khasi kala nang san nang mer haduh kumba ka long mynta, hynrei la buhteng ban suitñiew ia kaba yn kynthup biang ia kino kino ki dak ki ba dawa ha ki ktien shnong na ki katto katne ki thaiñ. Kumta ka la poi shaduh u pud ba la mih syndon da ki dak thoh ktien Jaintia.
Kaei kaba la phiah u phareng ha ka snem 1890 lyngba ka kpait treikam ban phiah bad synshar (divide and rule policy) ka la dei ba yn pyrshang tehsong biang, ha ka jingshisha. Tang na ka daw ba ka sorkar Bilat ka la dep kam trai pura ia ka thaiñ Jaintia ba kynthup ruh ïa ki elaka ba don mynta sha Karbi Anglong jong ka jylla Assam naduh u snem 1935, kumta ka phiah na ka Hima Khyrim ba dang synshar ki syiem bad dorbar Hima Khasi. Hangta la pynlong ïa ka Raijbah Khasi & Jaintia Hills (United Khasi & Jaiñtia Hills District) na ka bynta ban pynbiang ha ka rukom synshar khadar. Ka ba phylla mynta ka long ba ki paidbah Pnar na kita ki elaka ha Karbi Anglong bad na them Barak jong ka jylla Assam, kumjuh ruh ki paid Ri-War na shathie ka jylla Meghalaya haduh kito kiba sah sha Raijbah Sylhet ha Ri Bangladesh ki dang ñiew bad tip ïalade kum ki Khasi, ki dang pule kot Khasi bad kim bna eiei shapahng kita ki dakthoh Jaiñtia. Ka ba kham lyngngoh shuh shuh ruh ka long ba ym don shuh u ‘ng’ la bujli da uwei pat, u ‘ï’ la bujli da u ‘y’ ha kita ki dakthoh ktien Jaiñtia. Kane ka lah ban pynkulmar ia ki paid nongthoh khamtam ki khynnah skul. Nalor kata, u dak ba la bujli ha ka jaka u ‘ng’ u dei u dak-thoh-sur (phonetic alphabet) ba la buh thup ha kata ka thup ba ki khot ka International Phonetic Alphabet kaba dei tang ia ki dak Latin ba la pynkhreh ha ka spah snem ba khat khyndai ban pynbiang ryntih ïa ki sur jong kita ki dakthoh. Kata ka mut ba u dei u juh hi bad u ‘NG’ tangba shu kwah pynpher, hynrei ki dakthoh tynrai ba synlar (elementary alphabet) ki neh hi tang kito ki dakthoh naduh A haduh Z. Lada khmih ïa ki ktien shnong na ki thaiñ bapher ha Ri Khasi, ka ktien Amwi bad ktien Lyngam ka donkam sa u dak ‘cj’ katkum ka sur ba dei ban pule ia ki kyntien. Lehse, lah ban don sa kiwei kiwei ruh ki ban donkam dak uba biang thik katkum ka sur bad kata kan ym kut shuh lada shna thymmai.
Na kata ka daw ha ka jaka ban shna thymmai ïa ki ktien shnat ne tien shnong, la dei pynban ban bynrap ha ki dakthoh ktien Khasi nalor kiba la don A haduh Y. katkum ba la tih bniah na ki katto katne ki riewtbit ha ka ktien bad ka deiriti Khasi ki la ai jingmut ban kynthup ïa u ‘C’, ‘Cj’ bad ‘Oo’ ban kham biang bad lehse lah ban weng noh ïa u ‘G’ namar ba la biang da u ‘K’ ha manla ki kyntien. Ym lah ban batai ha kaba ïadei ia u C bad Cj namar lah ban ieh ha kito ki riewtbit na ki trai shnong ba kren ka ktien Amwi bad Lyngam lane kiwei kiwei pat ki thaiñ. Kat kum ba la ïa syllok na Amwi ki don kum I Bah H H Mohrmen bad Bah Mankular Lamin Gashnga bad ym artatien ba dang byllai kiwei kiwei ki ba tip. Ha thaiñ Lyngngam kum I Bah Witting Mawsor bad khlem artatien byllai kiwei kiwei ruh.
