U Myntri Sorkar Pdeng ba dei khmih ia ki Tnat Kam Pohiing bad Cooperation, u Amit Shah un plie ïa ka jingialang ba la tip kum ka “Strengthening PACS through FPOs” kaba shi sngi ha New Delhi ha ka 14 tarik Naitung, 2023. Ka jingthmu jong ka jingïalang kalong ban iamir jingmut ia ki rukom ban pynkhlaiñ ïa ki Primary Agricultural Credit Society (PACS) lyngba ki Farmer Producer Organisation (FPO).
Ha kane ka jingïalang yn sakhi ïa ka jingiashim bynta jong ki riewshemphang ha kane ka kam kumjuh ruh ki dkhot na ki FPO ha kylleng ka ri.Ia ka jing-ïalang la pynlong da ka National Cooperative Development Corporation (NCDC) ha ka jingïatreilang bad ka Tnat Cooperation jong ka Sorkar Pdeng.
Namar ba ki long ki kynhun ba seng da ki nongrep, kiba plié lad ïa ki ban lum lang ia ki jingdon jingem bad kyntiew ïa ka bor pan dor jong ki, ki FPO ki long kawei na ki lad ba kongsan tam na ka bynta ka jingkylla ha ki kam rep. Khnang ban pynurlong ïa ka thong jong u Myntri Rangbah duh, u Narendra Modi ha kaba ïadei bad ka “Sahkar se Samriddhi” ryngkat bad ki sienjam jong u Myntri Sorkar Pdeng ba dei khmih ïa ki Tnat kam Pohiing bad Cooperation, u Amit Shah, dang shen la shim ïa karai ban thaw 1100 tylli ki FPO ba thymmai ha kaba ïadei bad ki kam Cooperative.
Lyngba ka sienjam ba kongsan jong ka Tnat Cooperation, ka Tnat ka rep ka riang jong Sorkar Pdeng dang shen ka la wanrah shuh shuh iaki block sha ka NCDC ban thaw bad kyntiew 1100 tylli ki FPO ha kaba ïadei bad ki kam Cooperative lyngba ka jingpynkhlaiñ ia ki PACS hapoh ka skhim ban kyntiew ïa ki kam Cooperative bad ai ka jingkyrshan ïa ki nongrep kiba rit ba ria bad kiba kham duna ka ioh ka kot.
Hapoh ka Skhim FPO, la ai jingiarap pisa T. 33 lak sha man ka FPO.Shuh shuh, ka jingïarap pisa kaba T. 25 lak man kawei ka FPO la ai sha ki Cluster Based Business Organization (CBBO) ban kyntiew bad kyrshan ia ki FPO.
Ki FPO ki don ka bynta kaba kongsan ban pynlong ïa ki kam rep kiba ïaineh bad kiba kyntiew ïa ki lad kamai kajih bad ïa ka jingim jong kito kiba shaniah ha ka kam rep. Ki iarap ia ki nongrep kiba rit ba ria bad kiba kham duna ka ioh ka kot ban ioh ïa ki dor kiba biang, pynduna ka jinglut ha ka jingpynkit ia ki mar, bad kyntiew ka jingpynmih ia ki mar rep.
Ka Sorkar ka la trei na ka bynta ka jingïasoh jong ki PACS ha ka skhim FPO ban iarap ïa ki nongrep ban pynïar ïa ki kam jong ki kum ka jingpynpoi ïa ki mar ba donkam, ki tiar na ka bynta ki kam rep bad ka jing-shna ïa ki mar bam bad ka jingkyntiew ia ki mar kynthup ka jingpynkhuid, ka jingpeit bniah, ka jingpynbeit, ka jingbuh, ka jingpynkit ïa ki mar bad kiwei kiwei.
Ki PACS ki don ki dkhot kumba 13 klur ki nongrep kiba ioh shim ram ba duna samoi bad ka jingsam ia ki symbai, ki sboh bad kiwei kiwei.Mynta, palat 86% ki nongrep ha ka ri ki dei kiba rit ba ria bad kiba kham duna ka ioh ka kot.
Namar, ka don ka jingdonkam ban ïarap ïa kine ki nongrep ban ioh ïa ka teknoloji kaba katkum ka juk mynta, ka jingioh ram, ka jingpyndonkam ïa ki mar ba kham bha bad kham bun ki iew ban ai jingmyntoi ïa ki ban pynmih ïa ki mar kiba bha, ka sorkar ka ladep shim ia ki rai ban pynshlur ia kine ki nongrep ba ïasoh bad ki PACS ban thaw ïa ki FPO. Halor kane, la pyllait ia ka Skhim jong ka sorkar pdeng “Formation and Promotion of 10,000 Farmer Producer Organizations (FPOs)” hapoh ka jingkyrshan jong ka Tnat ka rep ka riang jong ka sorkar Pdeng.
Ka NCDC kadei ka kynhun kaba pyniaid ïa ki kam hapoh ka Tnat Cooperation da ka jingthmu ban saiñdur, ban kyntiew, bad bei tyngka ïa ki cooperative na ka bynta ban kyntiew ia ka jingpynmih ia ki mar rep bad ka jingwanrah ïa ki kam hadien ka por lum ïa ki mar rep. Ha u snem mang tyngka 2022-23, ka NCDC ka la pyllait pisa T.41,031.39 klur ha ki kam bapher bapher kynthup ka jingshna mar na ki mar rep, ki bynta ba shem jingeh, ka jingpyndonkam ia ki kor computer ha ki cooperative, ki kam jong ki cooperative kiba ai jingshakri, ai ram bad kiba ïadei bad ki samla.
PIB
