Kathmandu, Naitung:
U Myntri ka tnat kam bar ri jong ka Nepal, u NP Saud, ha ka Sngi Ba-ar u la kyntait ïa ka jingpyntip jong u nongrah ktien ka China sha Nepal ba la tei ïa ka Kad Liengsuiñ hapoh ka Belt & Road Initiative (BRI) hapoh Nepal.
U Saud u la kyntait ïa katei ka bynta hapdeng ka jingai jingkren sha ka International Relations & Tourism Committee ha kaba u la ong ba ym pat shym la sdang pyntreikam eiei ïa katei ka projek BRI hapoh Nepal tad haduh kine ki sngi.
Namar la ong ba utei u nongrah ktien jong ka China, na ka por- sha ka por u ju kynnoh ba ïa ka Pokhara International Airport la tei hapoh jong ka projek BRI.
Hynrei, u Saud ha katei ka jingialang u la ong ba katei ka jing kynnoh ka long kaba bakla bad ka Nepal kam pat ju ktah ne sdang pyntrei ïa katei ka projek naduh ka por ba la soi ïa ka.
Ha ki khyndiat sngi ba la leit, ka China ka la kynnoh ba ïa ka Pokhara International Airport la tei lyngba jong ka projek Belt & Road Initiative (BRI) bad ka long ruh kaei- kaei kaba sngew lyngngoh ban ïohsngew ïa kane. Naduh katei ka sngi, ki la mih ki
kynrum- kynram haba iadei bad ka Nepal namar ka China ka la sei ïa kawei pa kawei ka jingtei jong ka Nepal bad la kynnoh ba baroh kitei ki jingtei ki long lyngba jong katei ka projek BRI.
Watla katta, la ong ba utei u Myntri ka tnat kam bar ri jong ka Nepal, haba iakren bad ki heh ka House of Representatives ha ki khyndiat por ba la leit, u la iathuh ba ka Nepal kam pat lah ban pyntreikam ïa ka projek BRI namar ka dang don hapdeng ki jingpynbeit bad yn dang hap ruh ban ïa pynbeit shuh shuh bad ka China. Kumta, u Saud u la pynshai ruh naduh ki por ba la leit ba ym pat don kawei ruh ka jingpyntrei ka ban long lyngba jong katei ka projek BRI bad lada don kum kita ki jingpyntrei ruh hynrei kim dei pat lyngba jong katei ka projek.
Naduh kine ki khyndiat por ba la leit, ka jingiadei hapdeng ka China bad ka Nepal, ka la sdang ban troiñ bad sdang orpait namar kitei ki jing kynnoh ba ka China ka kynnoh pyrshah ïa ka Nepal haba iadei bad katei ka projek.
Haba iadei bad katei ka projek Belt & Road Initiative (BRI) ba la iasoi ha u snem 2017, ka Nepal ka la jied bad pynbeit ban wanrah haduh 35 tylli ki jingtei hapoh jong katei ka projek. Hynrei hadien kane, ka Nepal ka la pynduna noh ïa kitei ki 35 tylli ki jingpyntrei hapoh katei ka projek tang sha ka 9 tylli baroh. Nalor kata, ïa katei ka Pokhara Airport, ym shym la kynthup hapoh jong kitei ki 9 tylli ki jingtei jong ka projek BRI.
Ha u snem 2016, ka sorkar Nepal ka la soi ïa ka jingshim ram ba USD 215 Million na ka China, naka bynta ban tei ïa ka Airport Pokhara khlem da kdew ne kynthup ïa ka projek BRI. Namar kumba ka China ruh ka la shim ka jingkit khlieh ban pyntrei ïa katto katne ki projek hapoh jong ka BRI ha Nepal, kumta ruh kitei ki arliang ri kim shym la ïa pynpaw eiei la katei ka projek BRI kan long lyngba jong ka ram- lane ka jingiatrei lang.
