Shillong, Naitung 12:
Ka rangapkol ka Mawlai SC, u Neithovilie Chalieu u la leit phai biang sha ka klob barim, ka Shillong Lajong FC. Kane ka long ban pynkhreh ïa ka lympung ïalehkai I-League jong ka aïom ka ban wan.
Une u rangïalehkai ba dang 24 snem ka rta na Nagaland, u la ïoh ban ïalehkai nyngkong eh na ka Shillong Lajong ha ka I-league jong ka aïom ïalehkai 2018-19 kum u rangapkol ba nyngkong. Hynrei ha ujuh u snem kane ka kynhun ka la shah pynhiar kyrdan noh na ka I-League bad ka shimpor haduh saw snem ba kan wanphai biang sha kane ka lympung ryngkat bad ka Delhi FC.
Hadien ba ka Shillong Lajong ka la shah pynhiar kyrdan, u Neitho u la leit pynïasoh sha ka Ryntih Football Club bad u la ïoh ban ïalehkai ha ka Second Division League, hynrei kane ka kynhun kam shym la lah rung sha ka I-League.
Ha u snem 2021, u Neitho u la soi kontrak bad ka Mawlai SC kaba la rah ïa ka nam lahduh ha ka Shillong Premier League jong ka aïom ba la dep.
Lah ban pynkynmaw, u Neitho u dei u rangïalehkai uba la paw lyngba ka shlem ai jinghikai jong ka Shillong Lajong, kaba la rah ïa ka nam lahduh ha ka U-18 I-league ha u 2018.
Utei u rangïalehkai u la ïadon bynta ban khur ïa ka jingjop ha ka U-21 Dr T Ao Trophy na ka bynta ka Nagaland ha u 2018. U la ïadon bynta ruh ban khur jingjop na ka bynta ka skul na Nagaland ha ka U-14 Subroto Cup ha u 2012 nalor kiwei pat ki lympung.
Halor kane ka jingpynïasoh biang sha ka Shillong Lajong, u Chalieu u la ong, “Nga la soi bad kane ka klob namar ka Shillong Lajong ka dei ka klob kaba nyngkong eh bad borabor kane ka ju wan ha ki jingmut jingpyrkhat jong nga. Ka Shillong Lajong ka la plie lad ïa nga ba ngan ïoh ban ïashim bynta wat la ngam shym la poi pyrkhat.”
Lyngba kane ka jingsoi ïa ka kontrak kaba thymmai, une u rangïalehkai u la khmih lynti ba un ïalehkai bha ha ka Durand Cup, I-league bad ruh ba shisien ka sngi un ïoh ïa ka lad ban ïalehkai na ki klob ISL ha ka lawei ka ban wan.
