Shillong, Naitung 12:
Wat la ka jingsiang ïa u phlang plastik (artificial turf) hapoh SSA Stadium ha 1st Ground, Polo la lah ban pyndep, hynrei mynta ka la sdang ban wan mih paw ki dak ki shin jong ka jingpyntrei torti ïa ka kam.
Ïa katei ka madan la sdang ban pyntrei naduh u snem ba la lah bad kat kum ka jingpynpaw da u Myntri barim ba dei khmih ïa ka tnat ïalehkai ka Sorkar Jylla u Bah Banteidor Lyngdoh ha u snem ba la dep, la ong ba jingpynlut ka long haduh T. 14 klur tam ha ka ban siang ïa u phlang plastik bad ruh ban pynïeng ïa ki jingtbeh ding (flood light) khnang ban lah pynlong ïa ki jingïalehkai phutbol ynda la kem dum.
Kumba ka paw mynta la ïohi tang ka jingsiang ïa u phlang plastik ha kaba dangshen la lah ban pynlong ïa ki jingïalehkai ha la ïing jong ka Shillong Lajong FC na ka bynta ka wat khatduh jong ka Second Division League ha u Jymmang bad ruh ïa ka final jong ka Meghalaya State League ha ka 17 tarik u Jylliew.
Hynrei tang hadien katto katne sngi na ka daw ka jingwan lynshop u slap la ïohi ïa ki dak ki shin jong ka jingtrei torti ha kaba la shu pyndep jubor ïa ka jingsiang ïa u phlang plastik tang namar ban ïoh ïalehkai ka Shillong Lajong FC ïa ka wat khatduh jong ka Second Division League.
La ïohi ruh ba ha ka por ba slap, ka um ka lang halor katei ka madan bad kam shym la rngat wat hadien kumba shiteng kynta ba la rang u slap bad ki rubber sand ki la sdang ban lang tylli shi jaka. Kane kan shem jingeh bha ïa ki nongïalehkai ha kum kane ka madan namar kam long shuh kaba beit ryntih.
Kat kum ki tyllong khubor la ïathuh ba na ka liang ka Sorkar Jylla kan aiti noh ïa katei ka madan ha ka 15 tarik mynta u bnai sha ki bor ba dei khmih jong ka Shillong Sports Association (SSA).
Haba pyrshang ban kylli na ki dkhot ka SSA kiba la leit ban jurip hi da lade ïa katei madan ki la pynpaw ïa ka jingdiaw ban ïohi ïa kane ka jingpyntrei torti ïa katei ka madan namar kam i long ban pynlong ïa ki lympung ïalehkai bad wat ki nongïalehkai kin shem jingeh bha ban ïalehkai.
Lah ban kdew ba kane ka jingpyntrei torti ïa katei ka madan ka long tang na ka bynta ka jingmyntoi ka Shillong Lajong, kaba ïakhun ïa ki ar tylli ki jingïalehkai ha la ïing (home matches) jong ka Second Division League.
Napdeng ki madan ïalehkai kiba la siang da u phlang plastik hapoh ka Jylla, ka SSA Stadium lem bad ka Kiang Nangbah Stadium kaba ha Jowai ki long ki ar tylli ki madan kiba la shu pyntrei torti. Nangta kaba lyngngoh ka long wat ki karikor (engineer) jong ka State Sports Council of Meghalaya (SSCM) ki tap matlah ïa la ki khmat halor kane ka jingpyntrei torti.
