Seoul, Naitung:
Ka tnat shipai jong ka Seoul ha ka Sngi Balang, ka la pyntip ba ka North Korea ka la pynher ‘namding biang khlem da pynsngap ïa ka jingmaham na kiwei pat ki ri. Kane ka long hadien ba ka Pyongyang ka la byrngem ban siat pynbthei ïa ki liengsuiñ syntiat jong ka US kiba leit ban rung be-aiñ sha u pud- u sam jongka.
Ka South Korea ka la iathuh ba ka North Korea ka la ther ‘namding biang sha ki bynta jong ka East Sea ha katei ka sngi. La ong ba ka jingiadei hapdeng jong kitei ki arliang; ka North Korea bad ka South Korea, ka la tlor bha bad la i-kumba kitei ki arliang ri kin poi shaduh u pud ban iakhun thma bad ban ïa aireng mar pyrshah namar bun tylli ki jingïakynad kiba mih hapdeng jong kitei ki 2 ri.
Ka South Korea ka sdang ban pyrshah ïa ka North Korea naduh ba u nongialam ka North Korea, u Kim Jong Un, u la pynbna ba ka NK kan pyrshang pynher ïa ki ‘namding naka bynta ka jingpynbit – pynbiang ïa ka ri bad ka jingpynkhreh ïa ka lawei ban wan.
Haba iadei bad kane, ka South Korea bad ka United States, ki la maham ba ka North Korea kan ïoh da ka thma Nuclear ha kaba kut lada ka North Korea kam sngap ïa ki jingmaham bad lada kan dang pynkheiñ ïa ki kyndon ba la buh na ka por- sha ka por. Ha ka Sngi Nyngkong, ka North Korea ka la kynnoh ïa ka United States ba ka la pynkheiñ ïa ki kyndon haw-haw jongka, namar ka jingleit rung be-aiñ jong ka liengsuiñ syntiat na US sha North Korea bad kumta ruh ka la pynrem jur ïa ka jingphah ka US da ki lieng ngam um ‘Nuclear Missile Submarine’ sha ka duriaw ba hajan jong ka.
