Shillong, Naitung 12:
Ka khlur ïalehkai kaba bat ïa ka kyrdan ba-ar ha ka pyrthei ka Aryna Sabalenka ka la jam sha ka semi-final ha ka Wimbledon hadien ba pynliem noh ïa ka ’thei ïalehkai na America ka Madison Keys da 6-2, 6-4 ha ka sngi Balang ha London.
Kane ka ’thei ïalehkai kaba dang 25 snem ka rta na Belarus kan pynkhreh ban ïakhun semi final pyrshah ïa ka Ons Jabeur, kaba la lah ban pynliem ïa ka lahduh jong u snem ba la dep, ka Elena Rybakina.
Ha kane ka jingïakhun quarter final ka Sabalenka ka la ïakhun tyngeh naduh kaba sdang ha kaba kam shym la ailad ïa ka Keys. Kane ka lahduh jong ka Australian Open ka la ïai bteng ban ïakhun tyngeh bad ha kaba kut ka la lah ban khur syndon ïa ka jingjop.
“Ka long ka jingïakhun kaba eh bad nga sngewkmen ban wanphai biang sha ka semi-final. Kumta nga khmih lynti ban ïalehkai kham bha shuh shuh ban ïa kaba long ha ki por ba la leit,” la ong ka Sabalenka.
Kum ban shu pynkynmaw ha u 2021, ka la shah rem ha ka Karolina Pliskova ha ka jingïakhun semi final.
“Ka Madison ka long ka ’thei ïalehkai kaba kynsai, hynrei nga sngewkmen eh ban wanphai biang da ka jingjop na ka 2-4, 0-40 ha ka ‘set’ ba ar,” ka la bynrap.
