Silchar, Naitung:
Ar bnai hadien ka jingphet rieh na kti jong ki pulit, u Hifzur Rahman uba la shah rai ban shong patok shirta jingim namar ka kam pynïap briew jong u, u la shah siat ïap ha ki pulit jong ka Cachar ha ka step jong ka sngi Ba-ar naba u la pyrshang ban phet bad ïaleh pyrshah bad ki pulit hadien ba u la shahkem. Ha kane ka jingjia ki la don ruh arngut ki pulit kiba la mynsaw.
Kum shi bynta ban pynshisha halor ka jingjia, u SP jong ka Cachar u Nomal Mahatta ha ka jingïakren bad ki nongthoh khubor u la ong, ba ki la ïoh jingtip shaphang u Hifzur ba u la leit phai sha Barak Valley lyngba ka khappud Meghalaya.
Hadien kane, khlem da pynslem ki pulit ki la leit sha kane ka jaka bad ïohkem ïa u na khappud Assam-Meghalaya.
