Kano kano ka nongbah ne ka jaka sor ka don beit kata ka ‘Night Life’ kaba ki khot ha ka ktien nongwei lane ka jingim, jingïaid bad ka jingïadie ïathied ha ka por miet. Ka sor Shillong kat nang mih ki snem ka la nang kylla, bad kata ka ‘Night Life’ ruh ka la don ha kane ka nongbah jong ka Meghalaya. Ki jingkylla ki ju wan katkum ka jingdawa jong ka por. Ka jingwan tuid jong ki nongjngoh kai pyrthei sha kane ka sor kam dei kaba kai ha ka shi sngi, taïew bad bnai. Dei kine nalor ki trai ri trai muluk kiba long kiwei na kiba pyntyllun ïa ka ïoh ka kot ha kane ka jylla. Lada ka pisa kam tyllun, ka ïoh ka kot kan ym kiew. Katba ka sorkar ka nang pynshlur ïa ki briew kiba nabar ban wan jngohkai ïa ka jylla, kajuh hi ka sorkar ka pynduh mynsiem, pynduh ja ïa kiba kamai jakpoh. Ka hukum jong ka Deputy Commissioner ka East Khasi Hills ban phah khang ïa baroh ki dukan ha sor Shillong shwa ka 10 baje mynmiet ka la pynbitar lep ïa ki nongdie jingbam khamtam kiba don ha Khyndailad. Tang kiba mad ïa ka jingshah ktah ha kane ka hukum ki sngewthuh ïa ka jingkthang.
Kane ka hukum ka wan hadien ba ka jingïakynad ha Laitumkhrah ha kine ki khyndiat sngi hapdeng ki ar kynhun kaba la ïalam shaduh ka jingshah thang jong kawei ka kali pulit hapoh ka thanat Laitumkhrah. Kaei kaba la jia ka dei ka kam runar kaba ki pulit ki hap ban tohkit ïa kiba donkti. Tangba kaei ka jingïadei hapdeng ka jingshah thang ka kali pulit ha Laitumkhrah bad ki dukan? Hato dei ki nongdie dukan kiba pynshit ïa ki briew ba kin ïakynad para ma ki? Kam pat don kano kano ka sabut kaba biang ban pyni ba ki dukan ki dei ki daw bah jong ki jingsniew kiba kynrei ha sor Shillong. Ngi sngewthuh ruh ba ki don da ki spah ngut ki briew kiba kamai jakpoh da kaba die ja, sha, doh syang bad kiwei ha Khyndailad ha ka por mynmiet nalor kiwei pat ki jaka. Ngim pat ïakren ïa ki khun ki kti bad ki bahaïing hasem kiba shaniah na ka kamai kaba mih na kane ka jingdie jingbam bad kiwei ha ka por mynmiet. Hooid, ki ju don ki nongwan bam ne nongwan thied kiba la shoh khawiang bad kiba thaw jingkulmar hangne hangtai. Tangba ka sngewdei pat mo ban kynnoh ïa ki nongdie dukan ba ki dei ka daw jong ka jingmih ki jingkulmar?
Ngim lah sngewthuh ïa ka rukom treikam jong ka sorkar kaba kwah ba ki briew kin wan shane bad ha kajuh ka por kaba kwah ban khang ïa ki trai shnong ba kin shong die jingdie katba ki sngewbit. Bun ruh kiba sngewtynnad ban bam ïa ki jingbam ba die ha surok lane ‘Street Food’ na ki daw bapher-bapher. Kita ruh mynta ki la duh lad ban bam bad lada kim pat sngewthngan ruh, kin hap ban ïa leit thied ne bam noh shwa ka por 10 baje mynmiet ïoh lap ba duh ei! Wat ki nongwan jngohkai pyrthei ki sngewtynnad ban bam ïa kine ki jait jingbam khamtam ba mynta ki don kiba die jadoh bad kiwei ki jingbam ba shet hi da ki trai ri trai muluk. Ki don ki bym don por ban leit bam ha ka por mynsngi bad ki ïoh lad tang ha ka por mynmiet.
Ym baroh uba leit kai ha ka por mynmiet u dei u riewsniew. Ki bun ruh kiba bha. Lada kam dei kumta, ngin ïohi ïa ki jingjia ba triem jan man la ka miet ha kylleng sawdong. Ban shu tharai sniew ïa baroh kam dei. Ha ka jingshisha ka dei ka kamram jong ka sorkar ban pynbiang ïa ki pulit bad kiwei ki bor pahara ha ki jaka ïew kum ka Khyndailad wat ha ka por mynmiet ruh khnang ba kan don ka jingshngaiñ. Ïa kiba leh kam sniew, dei ban kem beit. Hynrei wat pyndik ïa kiba kamai jakpoh. Lada ktah ïa kine kiba kamai da ka lynti kaba hok bad ba dei, ka sorkar ka la leh aïu pat ïa kita ki ‘High-Level’ kiba ïaid mynmiet ban pynpoi tuh ïa u dewïong? Ka sorkar ka don jubab halor ki ‘High-Level’ haba ka wan pynwit ïa ki duk ki suk? Ïa ki ‘High-Level’ ka sorkar kam nud ban leh eiei namar ka ïadonkti lang katba ka ñion naphang ïa ki duk ki rangli kiba kamai jakpoh ha ka lynti kaba dei. Namarkata, ngi lah ban ong ba sniewbok ei ki nongdie jingdie ha Khyndailad namar kim dei satia ki dkhot jong ka kynhun ‘High-Level’. Ba kin da dei kita ki ‘High-Level’ ka sorkar kan ym nud ban leh eiei.
Ki kam sniew kam smeh kin mih beit lada khang dukan ha ka por 10 baje mynstep lane 10 baje mynmiet lane lada khang baroh shirta ruh. Kiba leh ïa ki kam sniew ki don beit la ki jong ki rukom treikam kumno ban ïoh leh ïa kata ka kam kaba ki thmu. Ki kam sniew kim don jingïadei eiei bad ka jingplie ne jingkhang ïa ki dukan. Ka dei ka kamram jong ki pulit ban ïada ïa ki kam sniew bad ban khtong ïa ki riewsniew bad ka dei ka kamram jong ka sorkar ban ym knieh ïa ka jakpoh jong ki nongshong shong. Tangba ngi dei ban sngewthuh ba ha kaba kut hi, uba ïap u dei beit u baduk.
