Guwahati, Naitung:
Ka kyrteng jong ka Susmita Dev kam shym la paw ha ka thup kyrteng jong ki kyrtong wat lada ka la khmih lynti, kane ka la long hadien ba ka seng Trinamool Congress ha ka lah sngi U Blei ka la dep ban pynmih ïa ki kyrteng jong ki kyrtong ki ban ïakhun ha ka ilekshon Rajya Sabha ha West Bengal.
Ka samoi treikam jong ka Susmita na Rajya Sabha kan sa kut ha u bnai ban wan, kata ha u Nailar ha ryngkat 6 ngut kiwei pat ki MP jong ka seng TMC ha Rajya Sabha.
Ha ka lah sngi U Blei haba ki heh nongïalam jong ka seng TMC ki la pyllait ïa ka thup kyrteng jong ki kyrtong ha Kolkata, la ïohi ba ka Susmita ka la pynlong ïa ka jingïakhih shah thngan hapoh ka nongbah ban pyrshah halor ka jingthmu ban buh ki jingpyrkhing ha ki bynta u pud u sam na ka bynta ka Silchar, kaba dei ka konstitwensi kaba la phah ïa ka sha Assam Assembly bad kumjuh sha Lok Sabha, na ka bynta ban mang ïa ka kynhun SC.
Kum shi bynta ban ai jubab ha kaba ïadei bad ka thup kyrteng jong ki kyrtong ba ka seng TMC ka la pyllait, ka Susmita ka la ong, ba ka dap da ka jingsngewnguh kaba khraw ïa ka Mamata Banerjee namar ka jingailad ïa ka ba kan lah ban mihkhmat napoh ka seng ha Rajya Sabha.
