Shillong, Naitung 13:
Ka Maw U-Tieng SC ka la khur ïa ka jingjop ba ar ha ka lympung ïalehkai Women’s League 2023 ba la pynïaid da ka Shillong Sports Association hadien ba ka lah pynliem noh ïa ka Kharang SC da 2-0 kol ha ka Sngi Palei ha madan Polo.
Kane ka nam jop ka la wan urlong lyngba ki kol ba la thep da ka Kynjailin Sohtun ha ka minit kaba 6 bad ka Phibashida Lyngdoh ha ka minit ba 23.
Lyngba kane ka jingjop, ka Maw U-Tieng ka la kamai 6 dor-thong (point) na ki saw sien ïakhun bad duh ruh ïa ka lad ban ïoh rung sha ka semi final na ka Group-B.
Haba phai sha kawei pat ka jingïakhun ba ar, ka Synroplang 77 ka la pynliem noh ïa ka Ïasnohktilang Madanrting FC da 1-0 kol na ka bynta ban khur ïa ka jingjop kaba nyngkong ha kane ka lympung.
Kane ka nam jop ka la wan urlong lyngba ka shi kol ba la thep da ka Aibanika Kharshiing ha ka minit kaba 20 na ka bynta ban khur ïa ki lai dor-thong (point).
Ka jingïalehkai kaba khatduh na ka Group-A kan long ha ka Sngi Thohdieng hapdeng ka PFR Football Academy pyrshah ïa ka Laitkor SC ha ka por 2:30 noh phai sngi. Kine ki kynhun kiba la ïaryngkat mar 12 dor-thong (point) kin ïaknieh ban lamkhmat na kane ka group. Ha ka por 4:15 janmiet yn pynbud sa ka jingïalehkai jong ka Group-B hapdeng ka Lumparing SC pyrshah ïa ka Mawlai SC. Kine ki kynhun kiba la kamai mar 12 dor-thong, hynrei ka Mawlai ka la ïoh ban lamkhmat hadien ba tam lyngba ka jingïapher kol.
