Shillong, Naitung 13:
Ka Executive Council jong ka Meghalaya State Olympic Association (MSOA) kan shong jingïalang ha ka taïew nyngkong u Nailar mynta u snem na ka bynta ban shim ïa ka rai halor ka jingmih pyrthei sa kawei pat ka synjuk ïalehkai karate ha ka Jylla.
Ïa kane la ïathuh da u Working President ka MSOA u Bah John F. Kharshiing uba la kubur halor ka jingkulmar jingmut ki kmie ki kpa jong ki khynnah ïalehkai.
Haduh 40 snem kynthih ka la don tang kawei ka synjuk ïalehkai ba la tip kum ka All Meghalaya Karate-Do Association (AMKA) kaba la seng ha u snem 1981 hapoh ka jingïalam u (L) Bah Stephan Leong. Hynrei, dangshen ka la wan mih pyrthei sa kawei pat ka synjuk ba la tip kum ka Meghalaya State Karate-Do Federation (MSKDF) hapoh ka jingïalam u Donny Raphael Ranee kum u President.
Hynrei kumba ka paw u General Secretary ka AMKA u Bah Ksankupar Warjri u dei uba bat ïa ka kam Treasurer hapoh ka MSAO bad u Bah Donny Ranee u dei executive member ka MSOA. Kane ka pyni ba u Bah Donny kum u dkhot ka MSOA u la wanrah ka jingpynkulmar jingmut ïa kiba bun ki khynnah ïalehkai bad ka long ruh kum ka jingpynkheiñ ïa ki kyndon ka MSOA.
Haba ïakren bad u nongthoh khubor ha ka sngi Ba-ar, u Bah John u la pynpaw ba ka jingmih ar tylli ki synjuk ïalehkai ka la wanrah ka jingkulmar jingmut ïa ki kmie ki kpa jong ki khynnah ïalehkai namar kim sngewthuh shuh kano na ki synjuk ïalehkai kaba dei. “Ki la don kiba la kylli na ngi ki nongïalam ka MSOA shaphang kane ka bynta, hynrei ngi la pynshai sha ki ba haduh mynta ngi dang ithuh tang ïa ka AMKA kaba la don mynta kumba 40 snem bad ngim don jingithuh eiei ïa kawei pat ka synjuk kaba dang thymmai.”
“Ka MSOA kam lah ban ithuh haduh ar tylli ki synjuk ïalehkai bad wat ka tnat ïalehkai jong ka Sorkar Jylla kan ym lah ban pynbiang ïa ki lad jingïarap ïa baroh ar tylli ki synjuk, hynrei beit tang ïa kawei kata tang ïa ka AMKA.”
Ha kaba ïadei bad ka jingphah jingthoh ka AMKA sha ka Sorkar Jylla lem bad sha ka MSOA, u Bah Kharshiing u la ïathuh da kaba ong, “Ka executive council jong ka MSOA kan sa shong jingïalang ha ka taïew ba nyngkong jong u Nailar na ka bynta ban shim ïa ka rai bad ban pynbeit ïa kitei ki kynrum-kynram.
Halor ka jingpynkheiñ kyndon u Bah Donny kum u dkhot ka MSOA, u Bah John um shym la lah ban pynpaw eiei halor kane ka bynta bad u la ong ba kane kan shong ha ka Executive Council bad ka AGM ki ban kin shim ïa ka rai.
