Shillong, Naitung 13:
Ka India ka la khur lai tylli ki takma ksiar ha ka sngi kaba ar jong ka Asian Athletics Championships hadien ba ka Jyothi Yarraji (100m hurdler) lem bad u Ajay Kumar Saroj (1500m) ki la lah ban khur ïa ka jingjop ha ka sngi Palei ha Bangkok.
U rangïalehkai uba la khur ïa ka takma rupa ha ka Commonwealth Games u Abdulla Aboobacker u la lah ban pynlong ïa ka India ban khur ia ïka takma ksiar kaba lai hadien ba la khur ïa ka jingjop ha ka men’s triple jump.
Kane ka long ka sngi kaba kyrpang na ka bynta ka India ha kaba ka la khur lai tylli ki takma ksiar napdeng ki 10 ngut ki nongïalehkai ha ka sngi Palei. Ka Aishwarya Mishra (53.07 sekhon) ka la khur sa kawei pat ka takma na ka bynta ka India hadien ba la khur ïa ka takma rnong ha ka 400m final.
Ka Yarraji kaba dang 23 snem ka rta ka la khur ïa ka takma ksiar na ka bynta ka India hadien ba ka la lah ban pyndep ha ki 13.09 sekhon na ka bynta ban khur jingjop ha ka 100m hurdles, katba ia ka takma rupa bad rnong la khur da ki nongïalehkai na Japan kata ka Terada Asuka (13.13s) bad ka Aoki Masumi (13.26s) ha Supachalasai Stadium.
Ha ka jingïakop mareh kaba 1500m jong ki shynrang, u Saroj ba dang 26 snem ka rta u la lah ban pynpaw ïa ka jingtbit ha kaba u la lah ban pyndep ha ki
3:41.51 sekhon.
Kane ka long ka takma kaba lai bad ka takma ksiar kaba ar na ka bynta u Saroj, uba la shah pyntbit ha USA ha u Jymmang ban pynkhreh ïa ka Asian Athletics Championships.
U Ajay Kumar Saroj u la khur ruh ïa ka takma ksiar ha u 2017 ha Bhubaneswar bad ïa ka takma rupa ha Doha ha u 2019.
Na ka bynta u Aboobacker, ka long ka aïom kaba biang eh ha kaba u la lah ban kynthih ha ki 16.92m na ka bynta ban khur ïa ka takma ksiar, katba ïa ka takma rupa la khur da u Ikehata Hikaru (16.73m) na Japan bad u Jangwoo Kim (16.59m) na Korea u la khur ïa ka takma rnong.
Kum ban shu pynkynmaw ha ka sngi Balang, u Abhishek Pal u la khur ïa ka takma rnong kaba nyngkong eh ha ka jingïakop mareh 10,000m jong ki shynrang.
