Shillong, Naitung 13:
Kumba la lai bnai kynthih ka kynhun ki ’thei ïalehkai phutbol ka ri kam shym la don ïa u coach ba pura naduh ba ka kontrak u Thomas Dennerby ka la poi sha kaba kut.
Kane ka kynhun ka dang don hapdeng ka jingpynkhreh na ka bynta ka Asian Games ka ban long ha u Nailur bad ka wat ba ar jong ka lympung ïaknieh rung sha ka Olympic (qualifiers) kan long ha u Risaw bad Naiwieng mynta u snem.
Kane ka jingbym don coach ka long ruh hadien hynriew bnai ba ka All India Football Federation (AIFF) ka la plie ïa ka Vision 2047 kaba pynpaw ïa ka jingangnud ban pynleit jingmut bha na ka bynta ki lympung ïalehkai ki kynthei bad shynrang naduh u 2026.
Kumba ka paw ka kontrak jong u Thomas Dennerby ka la poi sha kaba kut ha ka 31 tarik u Lber, hynrei utei u coach uba na Sweden u la ïai bteng ban pynïaid ïa kane ka kynhun ha ka wat ba nyngkong jong ka lympung ïaknieh rung Olympic pyrshah ïa ka Kyrgyzstan ha ka 4 bad 7 tarik u Ïaïong. Ka India ka la khur ïa ka jingjop kaba nyngkong da 5-0 kol bad ha ka jingïakhun ba ar da 4-0 kol ha Bishkek na ka bynta ban jam sha ka wat ba ar.
Na ka liang ki dkhot ka executive committee jong ka AIFF ki la pynpaw ba ki ’thei ïalehkai ki la pynpaw ïa ka jingthrang ba u Dennerby un wanphai bad bteng biang ïa kane ka kam haduh kaba kut jong ka wat ba ar jong ka Olympics qualifiers. “Ki nongïalehkai ki la ong ba ïa mynta ym don por shuh ban pynïadei bad u coach uba thymmai.”
Ka India kaba don ha ka kyrdan kaba 60 ha ka kyrdan jong ka FIFA, ka la shah kynthup lang bad ka Japan, Vietnam bad ka Uzbekistan ha ka wat kaba ar. Ka India kan ïakhun pyrshah ïa ka Japan ha ka 26 tarik u Risaw, ïa ka Vietnam ha ka 29 tarik bad ïa ka Uzbekistan ha ka 1 tarik u Naiwieng. Ki ar tylli ki kynhun ki ban wan ha ki kyrdan ba hakhlieh kin ïoh rung sha ka wat kaba lai bad kitei ki ar tylli ki kynhun kin ïoh rung sha ka Paris Olympics ka ban long ha 2024.
Kumba ka paw ka Japan bad ka Vietnam ki la ïoh rung sha ka Women’s World Cup, ka ban long ha Australia bad New Zealand, naduh 20 tarik mynta u bnai haduh 20 tarik u Nailar.
Dangshen ka executive committee jong ka AIFF ka la buh ka jingtyrwa ban thung ïa u Anthony Andrews, uba la lah ban pynurlong ban khur ïa ka nam lahduh ha ka Indian Women’s League 2022-23 na ka bynta ka Gokulam Kerala, hynrei u la kyntait ïa kane ka jingtyrwa.
