Shillong, Naitung 13:
Ka Players Selection Committee jong ka Meghalaya Basketball Association (MBA) kan pynlong ïa ka prokram jied ïa ki khynnah ïalehkai kynthei bad shynrang ki ban mihkhmat ïa ka Jylla sha ka ‘48th Sub Junior National Basketball Championship’ ban pynlong da ka BFI ha Rajiv Gandhi Stadium, Puducherry naduh 3 haduh 9 tarik u Nailar mynta u snem.
Kumta ka jingjied ïa ki khynnah ïalehkai kiba na Garo Hills kan long ha ka 14 tarik mynta u bnai ha Christian Girls Higher Secondary School kaba ha Tura naduh 1.00 haduh 5.00 baje janmiet.
Katba ka jingjied ïa ki nongïalehkai kiba na East Hills, Jaiñtia Hills bad Ri Bhoi District kan long ha ka 15 tarik mynta u bnai ha ka nongbah Shillong. Ïa ka jingpyrshang na ka bynta ki khynnah shynrang yn pynlong ha Shillong College bad na ka bynta ki khynnah kynthei kan long ha St. Mary’s Higher Secondary School. Ka por kan long naduh 8 baje mynstep shaneng ha baroh ar jaka.
Ka prokram jied nongïalehkai kaba khatduh (final selection trial) kan long ha Shillong na ka bynta kito ki nongïalehkai kiba la dep shah jied ha kaba nyngkong. Katba ka jingkilanmet na ka bynta ki nongïalehkai kan sdang naduh 18 haduh 29 tarik mynta u bnai ha Shillong. Kane ka long kat kum ka kyrwoh ba la pyllait da u General Secretary ka MBA, Bah Donald Steven Wahlang.
