Shillong, Naitung 13:
Ka Marketa Vondrousova ka la long ka nongïalehkai kaba nyngkong eh na Czech Republic ha ki 60 snem ban jam sha ka final na ki kynthei ha ka Wimbledon.
Kane ka wan urlong hadien ba ka lah ban pynkut noh ïa ka jingangnud ka ’thei ïalehkai na Ukraine ka Elina Svitolina da 6-3, 6-3 ha ka sngi Palei.
Ka Vondrousova kaba bat ïa ka kyrdan ba 42 ha ka pyrthei, kan ïaknieh nam lahduh ha ka sngi Saitjaiñ pyrshah ïa ka ’thei ïalehkai kaba la wan ba-ar ha u snem ba la dep ka Ons Jabeur, kaba la jop ia ka Aryna Sabalenka na Belarus da 6-7, 6-4, 6-3 ha kawei pat ka jingïakhun semi final kaba ar.
Ka Vondrousova kan pynkhreh ïa ka jingïakhun ba ar ha ka Grand Slam hadien ba ka la wan ha ka kyrdan ba-ar ha ka French Open 2019.
Kane ka ’thei ïalehkai kaba dang 24 snem ka rta ka la ïakhun tyngeh naduh kaba sdang kat haduh ba ka la lah ban pynliem ïa ka Svitolina.
“Nga sngewlah ban mutdur, hynrei nga sngewkmen ba nga la lah ban jam sha final. Ka Elina ka long ka nongïalehkai kaba khlaiñ bor bad ka long ka jingïakhun kaba eh bha,” la ong katei ka nongïalehkai kaba na Czech Republic.
“Ha ka jingshisha nga kulmar jingmut haba nga ïalehkai ha kane ka lympung. Nga la lah ban tam da 4-0 ha ka set kaba ar bad ka liang pyrshah ka la pyrshang ban ïakhun tyngeh.”
Ka jingïoh rung sha ka final ka la long kaba phylla ïa katei ka nongïalehkai kaba na Czech Republic namar ka la shah sumar ïa ka ksang kti haduh ar sien ha u snem ba la lah ha kaba ka la duh ïalehkai ha u 2022. “Ngam shym la ïalehkai ha ki hynriew bnai jong u snem ba la lah bad phim lah ban mutdur ba nga la lah ban wanphai biang sha kane ka lympung,” ka la bynrap da ka jingkmen halor ka jinglah ban wanphai biang ha kane ka lympung.
Haba phai sa ka Svitolina ka long ka sien kaba ar ban ïoh rung sha ka semi final ha ka Grand Slam naduh ba ka la wanphai na kaba kha khun ha u Ïaïong. Hynrei ka la pyrshang ban ïalehkai bha ha ka wat kaba nyngkong na ka bynta ban ïaryngkat mar 3-3, hynrei katei ka nongïalehkai na Czech Republic ka la lah ban tam kylla hashwa ba ka Svitolina kan tam da 4-0 ha ka set kaba ar.
Hynrei ka Vondrousova ka la ïakhun tyngeh kat haduh ba ka la lah ban tam ïa ka Svitolina na ka bynta ban khur syndon ïa ka jingjop.
