Shillong, Naitung 14:
Ka kynhun ïalehkai Indian Super League (ISL) ka Chennaiyin FC ka la soi nyngkong ïa u rangïalehkai nabar ri u Jordan Murray uba na Australia na ka bynta ban pynkhreh ïa ka aïom ïalehkai 2023-24.
Une u rangïalehkai shakhmat ba dang 27 snem ka rta u la ïasoh sha kane ka klob hadien ba u la pynlut ïa ka aïom ïalehkai ba la lah bad ka Nakhon Ratchasima FC kaba na Thailand.
“Nga sngewkmen eh ban ïadon bynta bad kane ka klob kaba khraw ka Chennaiyin FC. Ngam sngewlah ba ngan ïakynduh ïa kane ka kynhun bad ïa baroh kiba don bynta bad ka klob. Nga la khmih lynti ban wanphai sha India bad nga da kwah eh ban ïakynduh ïa ki para nongïalehkai bad ruh ïa ki nongkyrshan ka Chennaiyin,” la pynpaw utei ha ka kyrwoh ba la pyllait da katei ka klob.
Kham hashwa u Murray u la wan ïalehkai sha India, hadien ba u la ïoh ban ïalehkai nyngkong ha ka ISL na ka bynta ka Kerala Blasters FC ha ka aïom ïalehkai 2020-21 hashwa ba un leit ïasoh sha ka Jamshedpur FC ha ka aïom ïalehkai 2021-22 ha kaba la khur ïa ka ISL Shield.
Ha kitei ki ar tylli ki aïom kiba u la ïalehkai ha ka ISL, u Murray u la ïoh ban thep 11 kol na ki 34 sien ïakhun.
