Aizawl, Naitung:
U Vice-President jong ka BJP ha Mizoram u Vanramchhuanga u la hiar shuki noh ha ka sngi Palei kum shi bynta ban ïakhih halor ka jingong jong u ba ka sorkar kmie ka la sngewpher jingmut ïa ka kynhun jong ki Khristan ha kaba ka la wanrah ka jingïai bteng jong ki jingïakynad bad jingïaumsnam hapdeng ki riewlum Kuki-Zomi bad ki Meitei ha ka jylla ba marjan ha Manipur.
Ha ka shithi iehnohkam jong u ba la phah sha u heh nongïalam ka BJP jong ka Mizoram Vanlalhmuaka, u la ong ba u da sngew ktah haduh katta katta halor ka jingshah pynjulor jong ki ïingmane ki Khristan ha Manipur ha kaba u la pynshisha da kaba ong, ba ïa kane la kyrshan da ki heh nongïalam jong ka jylla bad sorkar kmie.
Ki la don palat 150 ngut ki briew kiba la ïap haduh mynta bad kiba bun kiwei pat ki la mynsaw naduh ba la jia ka jingïakynad hapdeng ki jait bynriew Meitei bad Kuki ha ka jylla Manipur ha ka 3 tarik, Jymmang.
