Guwahati, Naitung:
Ka jingshlei um ha ka jylla Assam ka la nang jur ha kaba kiba bun ki distrik ki la ïakynduh jingeh na ka jingshlei um. Katkum ka jingpyllait khubor jong ka lad phah khubor ba la phah da ka Assam State Disaster Management Authority (ASDMA), la ong ba kiba bun ki distrik kiba kynthup ïa ka Biswanath, Bongaigaon, Chirang, Dhemaji, Dibrugarh, Kokrajhar, Majuli, Nalbari, Tamulpur, bad Tinsukia ki la ïohmad ïa ka jingshlei um kaba shyrkhei. Kumba la antad la ong ba ki jingthung ha 2211.99 hectare ka lyngkha ki la shah ktah lut na ka jingshlei um, ha kaba kane ka la ktah jur ïa ka rukom im jong ki briew.
Kum shi bynta ban ong ei ei halor kane ka jinglong jingman, u Myntri Rangbah jong ka jylla u Himanta Biswa ha ka jingthoh kaba u la phah lyngba ka Twitter u la ong ba u la shimkhia ha kaba ïadei bad ka jingpyllait um na Kurichhu Dam. U la hukum ïa ki bor sorkar ba ki la dei ban khmih bniah bad pynbiang ki jingdonkam na ka bynta ki paidbah khamtam kito kiba shong harud jong ka wah Beki bad Manas bad ban ïaleh ban pynkynriah jaka ïa ki namar ka jingap jingma na ka jingshlei jong ki wah.
