Washington, Naitung:
Ha kane ka por, la ong ba ka jingkylla ka suiñ bneng bad ka jingkhluit ka la ktah ia ka pyrthei baroh kawei. Ki ri kum ha Europe, China bad ka United States ki la ioh mad lypa ia ka jingkhluit kaba jur bha jong ka suiñ bneng ha kine ki sngi. Kumta ruh ka la mih ka jingmaham ia ki ri jong ka pyrthei baroh kawei namar ka jingma kaba ap ia ka pyrthei na ka jingkylla jong ka suiñ bneng.
Ha kajuh ka por ruh, ka tnat National Weather Service ka la maham lypa ia 100 million ngut ki paidbah nongshong shnong ka America ba kin hap ban ioh mad ia ka jingkhluit bad jingshit kyr-ang jong ka sngi khamtam ha ki nongbah kum ka Arizona, California, Nevada bad ha Texas.
Kumjuh ruh kane ka jingmaham ka leit sha kito ki ri jong ka dew bah Europe kiba kynthup ia ka France, Germany, Italy, Spain bad ka Poland, kiba la ioh mad lypa ia ka jingkhluit ka suiñ bneng naduh kine ki sngi.
Kumta, la ong ba ka jingshit jong ka suiñ bneng ka lah ban tam palat ia ka 48 Degree Celsius lane kumba 118.4 Degrees Fahrenheit ruh ha ka dew lynnong Sicily bad Sardinia, la ong ka European Space Agency ha ka kaiphod ba iadei bad ka jingkylla ka suiñ bneng.
Kumjuh ruh wat ka North Africa ka la ioh mad ia ka jingshit kaba jur ha kine ki sngi bad ka la ioh ruh ia ka jingmaham na ka Moroccan Meteorological Service ba ka lah ban ioh mad ia ka jingkhluit kaba kham palat shuh shuh ha ki por ban wan.
Shuh shuh ruh la ong ba katto katne ki bynta jong ka China, kiba kynthup ia ka nongbah Beijing, ki la sdang ban sakhi ia ka jingshit kyr-ang jong ka suiñ bneng.
Ha u bnai ba la lah, ka tnat NASA bad ka tnat Copernicus Climate Change Service jong ka European Union ki la iathuh ba u Jylliew u long u bnai uba ioh mad ia ka jingkhluit kaba jur tam ha une u snem.
Kumta ki heh jong ka World Meteorological Organization (WMO) ki la iathuh lypa ba ka jingkhluit bad jingshit kyr-ang ka suiñ bneng ha kine ki sngi, ka long ka dak jong ka jingma kaba khraw ia ka pyrthei baroh kawei.
Namar la ong ruh ba ka jingkhluit jong ka suiñ bneng, ka long ka jingma kaba khraw tam eh ia ka pyrthei, katkum ka jingwad bniah jong ka WMO. La iathuh ruh ba kmumba 61,000 tam ki briew kiba la khlad na ka jingkylla bad jingkhluit palat jong ka suiñ bneng hapoh ka dew bah Europe ha ka aïom lyiur jong u snem ba la leit.
