M. S. Ryngksai, Dawki/Lummawbah
La sngewdei ban kyntu jur ïa ki para khun – u – Hynñiew – Trep baroh phar ban ïeng tylli lang baroh ban ai ka jingkyrshan tylli tyllan ïa ka jingdawa jong ka Jaiñtia Durbar na ka bynta ka “Khasi – Jaintia State’ lane “Ka Hynñiew – Trep State” kaba long ka kyrteng kaba kdup lut ïa u khasi u Pnar (Jaintia), U Bhoi, u War, u Maram bad Lyngngam ïa kaba la pdiang da baroh ki Riewstad bad Riewshemphang jong ka jaidbynriew jong ngi kum u Soso Tham bad kiwei kiwei naduh ka por hyndai hynthai khnang ba ka jaidbynriew hynñiewtrep bad ki pateng jong ka kin lait noh phar na ka jingshah ñiewbeiñ bad na ka jingshah longmraw ha kiwei pat ki jaidbynriew kiba kham duna ban ïa ngi ha ka liang ka jingbun paid bad ha ka jingnang jingstad.
Kam myntoi shuh kata ka jingdawa ban pynkylla thymmai ia ka bhah thungkam thungjam bad pule puthi namar ngi la iohi shai kdar naduh basdang ioh Meghalaya ba ki Garo kim shym la lah ban pyndap wat tang 20 % na ka bhah jong ki kaba long 40 % hynrei da lei lei ruh kim shah ban pyndap ne thep da ki khun u Hynñiew trep ha ki jaka ba kim lah ban pyndap. Nalor ba kim lah ban pyndap ïa kata ka bhah (40 %) jong ki haduh mynta mynne ki dawa sa ïa kata ka “Roster System” ban khanglad syndon ïa ki khun samla Hynñiew Trep ban ioh kam ioh jam bad ban ioh leit pule Medical, Engineering bad kiwei kiwei ki laiñ jingpule. Ngi iohi shai kdar ruh ba ym dei tang ba ngi duhlad ha ka iohkam iohjam bad pule puthi, hynrei ngi duhnong ruh haduh katta katta ha ka liang ka roi ka par namar ba ngi shah tehmraw bad shah synshar ha ki Garo, kumta ki rah lut khoit ïa ka spah ka phew jong ka Jylla Meghalaya sha Ri lum Garo. Lano kin sdang ïa kata ka Medical College ha Shillong katba ha Tura ki la jan dep tei. Ka khleiñ bad dohmet dohkshong baroh ki la rah lut sha Garo, ki ieh ha ngi ki khun u Hynñiewtrep sa tang ka dohshyieng bad don satar suda.
Ngi iohi ruh ba kata ka jingdawa ban pynkylla thymmai ïa ka bhah thung kam thung jam bad pule puthi kam shym rung sha ki shkor jong ki Garo bad ki da pyrshah tyngeh bad kin nym shah hi ruh lano lano ban pynkylla thymmai ia ka Reservation Policy hapoh ka State Meghalaya katba ngi dang ïa don lang ha kajuh ka Jylla namar ngi shah synshar bad shah pynïaid ha ki naduh ba sdang ioh Meghalaya. Kumta ka la biang eh ka por ba ki khun u Hynñiew trep kin ia tylli mlon ban mih noh sha madan ne sha surok da ki lak lak ngut ban dawa noh da ka Hynñiew Trep State kumba la sdang da ka Jaiñtia Durbar bad dei tang kane ka lad ka ban pyllait pher ïa ngi na ki jingeh baroh phar kiba ngi ïa kynduh naduh ba ioh Meghalaya haduh mynta. Ym dei shuh ban shah shkor ne ailad ïa ki Nongïalam bad Ïingkhong shyllangmat, ki khwan myntoi shimet ba kin pynbiej tang ba kin jop elekshon, ban ioh shuki Minister, bad ban die mraw ïa la ka Ri bad ka Jaidbynriew lajong. Ki pynkhihwin ïa ki paidbah tang shipor shipor khnang ba kin ioh ki envelop kiba heh baheh na ki Nongïalam jong ka jaidbynriew Garo kiba bat bad pynïaid katba ki mon ia ka Sorkar Jylla namar ba ki ieit hok ïa la ka jaidbynriew. Shano kata ka Expert’s Committee bad lano kan treikam bad kan neh haduh katno por ne kan shu jah rngai kumba jah bun bun tylli ki Committee ka Sorkar u Conrad Sangma kiba shu jah khlem da pyndep ïa la ki jong ki kamram.Ki Nongmihkhmat Garo ki ieit ïa la ka Ri Garo bad ka jaitbynriew la jong haduh katta katta, namarkata ki thied da ki phew bad spah klur ïa ki Nongmihkhmat Hynñiew Trep na ka bynta ka jingmyntoi jong ka jaidbynriew la jong. Na ka bynta ka jingmyntoi ka jaidbynriew Garo, ki Nongmihkhmat jong ki baroh 24 ne 25 – 26 ngut katba ki don kin ïeng tylli kawei khlem khein la ki don ha kano kano ka Party lane la ki don ha ka liang synshar ne liang pyrshah na ka bynta ka jingmyntoi jong ka jaidbynriew la jong ki ia long kawei.
Ka Jylla Meghalaya ka la palat ïa ka 50 snem ha kaba ngi ïadon lang ma ngi ki khun u Hynñiew Trep bad ki jaidbynriew Achik ne Garo kiba don bun ki jingïapher ha ka Riti – Dustur bad kiwei kiwei ki rukom. Kum ki jaidbynriew Riewlum jong ka North East India ngi la don hapoh ka sorkar Assam tang kumba 20 snem tam ei ei bad dei tang namar ba ka Sorkar Assam ka thmu ban pynrung ïa ka ktien Assamese hapoh ki Ophis bad jaka treikam ha ka Sorkar baroh basa ïeng tylli ki paidbah Hynñiew Trep ban ioh la ka jong ka Jylla ba kyrpang ka long pynban kumba ong, “Na ka Nar ha u Dek.” Ngi iohi mynta ba ki Garo ki ïaleh ban pynkylla ia ki bynta ka Bri U Hynñiew Trep sha ka Rilum Garo. Bun bun ruh ki longkmie Hynñiew Trep kiba shong kurim ia ki shynrang Garo ki hap ban kylla jaid Garo noh ha ryngkat bad ki khun ki kti jong ki. Ngi iohi ruh bala bun ki Assembly Constituency kiba don hapoh ka Bri u Hynñiew Trep la wan ïaleh elekshon da ki jaidbynriew Garo bad la don ruh kiba jop bad long MLA ne Nongmihkhmat da ki Garo hapoh ka Bri U Hynñiew Trep ngim dei shuh ban ïaid matlah, ngi la dei ban kyndit thiah noh ym ban shah kynoi shuh ha ki Nonglilam bad ki Nongdie mraw ia la ka Ri bad ka jaidbynriew baieit jong ngi. Kaei kaba la leh bakla da ki Nongmihkhmat Hynñiew Trep ha ka por ba ioh ïa ka Jylla Meghalaya, ngi dei ban pynbeit mynta mar mar ym dei shuh ban dang buhteng.
Ngi iohi ruh ba ym dei tang ki jylla Riewlum kum ki Naga, Mizoram, Meghalaya bad kiwei kiwei kiba pait na ka Jylla Assam hynrei bun bun ki Jylla shapoh ka Metbah India ruh kiba pait bad mih ar ne lai tylli tang na kawei ka Jylla kaba rim. Kumta ka por ka la biang bha ïa ka Jylla Meghalaya ban pait ne phiah noh sha ki Ar tylli ki Jylla kata sha ka Hynñiew Trep State bad Achik/Garo State. Kynmaw ko ki khun u Hynñiew – Trep ba katba ngi dang sah lang bad ki jaidbynriew Garo, ka jaidbynriew Hynñiew Trep jong ngi ka nang ring sdot bad im jyllai jyrwit namar ngim shym ioh ïa ki Nongialam jaidbynriew, ngi dang ioh tang ki Nongïalam Ri bad Jaidbynriew naduh ba ioh Meghalaya haduh mynta katba ka jaidbynriew Garo pat naduh basdang haduh mynta ka ioh da ki Nongïalam kiba paka bad ba da ieit shisha ïa la ka Ri bad ka jaidbynriew lajong.
Lada kum ka jaidbynriew Hynñiew Trep kaba shah synshar ha ka jaidbynriew Assamese tang kumba 20 snem tam ei ei balei ngin shah synshar pat ha ka jaidbynriew Garo da palat 50 snem ei ei. Ngi la dei ban kyndit bynriew noh ban ïeng ialeh kloi kloi bran bran ban ioh da la ka jong ka Jylla Hynñiew Trep ym dei shuh bad nang hap ha ka jingjynjar trah.Ynda la ioh ïa ka Jylla Hynñiew Trep la jong ngi dei ruh ban kynmaw shuwa ïa u pud u sam uba biang katkum ba la buh bad la pruid dak da u Ñi u Kong bad ki kpa tymmen naduh hyndai hynthai. Ngim dei ban duh ei wat tang shi ksai ne shi in chi ka jaka ne khyndew ka shyiap jong ngi. Kumjuh ruh ynda la ioh ka Jylla la jong ngi dei ban pyrthuh bud ïa ka rukom jong ki Manipur (Kuki) ba yn nym shah ban pynrung Schedule Tribe ia kano kano ka jaidbynriew bym dei Hynñiew Trep hapoh ka Jylla Hynñiew Trep jong ngi bad ngim dei ruh ban ailad ïa ki ban ïaleh elekshon hapoh ka Bri u Hynñiew Trep jong ngi. Kino kino ki bym dei ki khnun u Hynñiew Trep haba ki shong ki sah hapoh ka Bri u Hynñiew Trep kim dei ban long trai ne long kynrad kin dei beit tang ki nongbylla bad nongtrei jong ngi.
Ha ka liang u pud u sam mynta katba ngi dang iadon lang hapoh ka Jylla Meghalaya, ngim dei shuh ban shah ia u Conrad ne iano iano ban pynbeit katba ki mon ma ki, lada don mano mano ba tam pud ne kyntur pud, dei ban pyrthuh bud ïa ki jaidbynriew Naga bad Mizo ban ïaleh ïa la ka jong ka hok ym dei shuh ban shu ïa bun tang ka ktien la dei ban leh beit beit da ka kam shlur kumba leh ki Naga bad Mizo.
